AQSh vıtse-prezıdenti respýblıkashyldardyń saılaýda jeńilý sebebin túsindirdi
ASTANA. KAZINFORM – AQSh vıtse-prezıdenti Djeı Dı Vens Respýblıkalyq partııanyń Kongreske ótken aralyq saılaýda jeńilýin Iranmen soǵysqa jáne Izraılmen qarym-qatynasqa baılanystyrdy, dep habarlaıdy Anadolu.
Vens bul týraly X áleýmettik jelisindegi paraqshasynda jazyp, saılaý nátıjesine áser etken negizgi faktorlardy atady.
Onyń aıtýynsha, respýblıkashyldardyń jeńilýine Iranǵa qarsy áskerı qımyldar men Izraılge qatysty saıasat yqpal etken. Vıtse-prezıdent buǵan deıin Donald Tramptyń da osyndaı pikir bildirgenin eske saldy.
– Bizdiń jeńilýimizdiń sebebi – soǵys. Bul jaǵdaıdyń shynaıy sebebi barlyǵyna derlik túsinikti. Bizden teris aınalǵan saılaýshylardy qalaı qaıtarýǵa bolatynyn anyqtaý úshin qoǵamdyq pikirdi zertteý jónindegi mamanmen keńestim, – dedi Djeı Dı Vens.
Vıtse-prezıdent partııanyń saıası ustanymyn qaıta qaraý úshin tórt baǵytqa nazar aýdarý qajet ekenin aıtty. Atap aıtqanda, Iranmen soǵysty toqtatý, halyqtyń kúnkóris shyǵyndary men ınflıatsııa máselesine basymdyq berý, «Amerıka birinshi orynda» qaǵıdatyn júzege asyrý jáne Izraılmen qarym-qatynasty qaıta qaraý usynyldy.
Sonymen qatar Vens Respýblıkalyq partııanyń saılaýaldy jaǵdaıyn baǵalaǵan sarapshylardy synǵa aldy. Onyń sózinshe, olar partııa basshylyǵyna saılaýshylardyń kóńil-kúıi týraly shynaıy aqparat bermegen.
– Bizdiń taraptaǵy derekterdi taldaýshylar nazar aýdarǵan máselelerdiń biri saılaýshylardyń quramy boldy. ıAǵnı saılaýshylardyń qurylymy respýblıkashyldardyń jeńisi úshin qajet 2024 jylǵy kórsetkishterge qanshalyqty sáıkes keletini zertteldi. Saýalnamalar demokrattardyń aıqyn jeńisin boljaǵanyna qaramastan, bizge usynylǵan derekter únemi bir kórinisti kórsetti. Keıbir shtattarda saılaýshylardyń belsendiligi jetkilikti joǵary, al basqalarynda óte jaqsy boldy. Birde-bir shtatta qatysý deńgeıi apatty túrde tómen bolǵan joq, – dep jazdy Vens.
Onyń aıtýynsha, osy málimetter partııa komandasynyń saılaý nátıjesine qatysty optımıstik kózqarasyn qalyptastyrǵan.
Vıtse-prezıdent aldaǵy aılarda qoǵamdyq pikirge yqpal etýge baǵyttalǵan túrli áreketter bolýy múmkin ekenin de eskertti.
Atap aıtqanda, ol zańsyz mıgranttarǵa jappaı raqymshylyq jasaý týraly usynystardy synǵa aldy. Degenmen zańsyz jumys kúshin paıdalanatyn kásiporyndarǵa baqylaýdy kúsheıtý sııaqty kóshi-qon saıasatyn júzege asyrý tásilderin ózgertýge daıyn ekenin jetkizdi.
Sóz sońynda Vens saılaýdaǵy jeńilisti aldyn ala eskertken azamattardyń narazylyǵyn túsinetinin aıtyp, olardy ashýdy ysyryp qoıyp, el úshin jumys isteýge shaqyrdy.
Buǵan deıin AQSh prezıdenti Donald Tramp ta Iranmen soǵystyń respýblıkashyldardyń saılaýdaǵy nátıjesine áser etkenin moıyndaǵan bolatyn. Onyń aıtýynsha, Iran máselesi jeńiliske yqpal etken sebepterdiń biri bolǵan.
Aıta keteıik, buǵan deıin AQSh-ta ótken aralyq saılaýda demokrattardyń Senat pen Ókilder palatasynda basymdyqqa ıe bolǵany habarlanǵan edi. NBC News boljamyna sáıkes, demokrattar Senatta qosymsha jeti oryn jeńip alyp, Ókilder palatasynda keminde 258 mandat ıelenýi múmkin. Jekelegen okrýgterde daýys sanaý jalǵasyp jatyr.
