AQSh vıtse-prezıdenti Iranmen kelissóz júrgizý úshin Pákistanǵa attandy
ASTANA. KAZINFORM – AQSh vıtse-prezıdenti Djeı Dı Vens 10 sáýir kúni Pákistanǵa ushyp ketti. Islamabadta 11 sáýirde Iranmen kelissózder bastalady, dep habarlaıdy BBC.
– Biz kelissózderdi asyǵa kútip otyrmyz, – dedi Vens Islamabadqa ushar aldynda.
Onyń aıtýynsha, AQSh Iran «adal áreket etse», dıalogqa daıyn. Alaıda aldaý áreketi baıqalsa, Vashıngton mundaı qadamdardy qabyldamaıdy. Vens sondaı-aq Donald Tramp kelissózderge qatysty naqty tapsyrmalar bergenin aıtty.
Amerıkalyq delegatsııa quramyna prezıdenttiń arnaıy ókili Stıv Ýıtkoff jáne Tramptyń kúıeý balasy Djared Kýshner kirgen.
BBC málimetinshe, Islamabad kelissózderge belsendi daıyndalyp jatyr, parlament mańynda qaýipsizdik sharalary kúsheıtilip, túsirilim toptary shektelgen.
Sonymen qatar, Iran delegatsııasynyń qatysatyny ázirge naqty belgisiz. Iran SІM-iniń joǵary laýazymdy ókili bul másele áli tolyq sheshilmegenin málimdedi.
Buǵan deıin Iran parlamentiniń spıkeri Mohammad-Bager Galıbaf kelissózder bastalǵanǵa deıin qarsy tarap Lıvandaǵy soqqylardy toqtatyp, Irannyń buǵattalǵan aktıvterin bosatýy tıis ekenin aıtqan.
Irannyń Tasnim agenttigi kelissózder Lıvandaǵy atysty toqtatý týraly kelisimge qol jetkizilgenge deıin keıinge qaldyrylǵanyn habarlady.
Aıta keteıik, AQSh pen Iran arasyndaǵy kezdesý Pákistannyń deldaldyǵymen ótedi jáne eki aptaǵa jarııalanǵan ýaqytsha bitim aıasynda uıymdastyrylyp otyr.
