AQSh vıtse-prezıdenti Gaza sektoryndaǵy bitimdi qoldaý úshin Izraılge bardy
ASTANA. KAZINFORM — Bul joǵary deńgeıli sapar atysty toqtatý jónindegi názik kelisimdi nyǵaıtýǵa baǵyttalǵan, dep habarlaıdy Kazinform agenttiginiń menshikti tilshisi.
AQSh vıtse-prezıdenti Djeı Dı Vens seısenbi kúni Izraılge eki kúndik saparmen bardy. Sapar barysynda ol Izraıl men HAMAS arasyndaǵy bitim shartyn júzege asyrý máselesin talqylaýdy josparlap otyr.
Ben-Gýrıon atyndaǵy áýejaıǵa qonǵannan keıin Vens eldiń ońtústigindegi Kırıat-Gat eldi mekenine bardy. Onda AQSh-tyń qoldaýymen qurylǵan, bitim sharttarynyń oryndalýyn baqylaýǵa arnalǵan halyqaralyq kúshterdiń shtaby ornalasqan.
.@VP and @SLOTUS are greeted by @USAmbIsrael and other dignitaries upon landing in Israel earlier today.
— Rapid Response 47 (@RapidResponse47) October 21, 2025
The Vice President will join other officials in the region in working on next steps in the Trump Administration's Gaza Peace Deal. pic.twitter.com/0hCrXpR5x1
The Times of Israel basylymynyń Aq úı ókilderine silteme jasap habarlaýynsha, úılestirý ortalyǵynyń quramyna Mysyr, Qatar, Túrkııa jáne, boljam boıynsha, Birikken Arab Ámirlikteriniń áskerı mamandary kiredi. Vens birqatar jabyq brıfıngter ótkizip, keıin Izraıl premer-mınıstri Bınıamın Netanıahý jáne prezıdent Itshak Gertsogpen kezdesedi.
BAQ habarlaýynsha, bul sapar AQSh ákimshiliginiń Izraıl basshylyǵynyń áreketteri arqyly bitim buzylýy múmkin degen alańdaýshylyǵy aıasynda ótip jatyr.
Buǵan deıin New York Times gazeti AQSh prezıdenti Donald Tramptyń ákimshiligi Netanıahýdyń HAMAS-pen soǵys áreketterin qaıta bastaýynan qaýiptenip otyrǵanyn jazǵan bolatyn.
— Sapardyń basty maqsaty — qol jetkizilgen kelisimdi nyǵaıtyp, qaqtyǵystyń qaıta órshýine jol bermeý, — dedi Aq úı ókili.
Saparda Vensti AQSh-tyń arnaıy ókili Stıv Ýıtkoff pen Aq úıdiń aǵa keńesshisi Djared Kýshner ertip júr.
Aıta keteıik, osyǵan deıin AQSh prezıdenti Donald Tramp Gaza sektorynyń ońtústigindegi Rafah qalasynda atysty toqtatý rejımin buzýdyń artynda palestınalyq HAMAS uıymy turǵanyn aıtty.