AQSh vıtse-prezıdenti 2028 jyly prezıdenttikke úmitker retinde qarastyrylyp otyr
ASTANA. KAZINFORM – Vıtse-prezıdent Djeı Dı Vens Respýblıkalyq partııa atynan 2028 jyly prezıdent qyzmetine basty úmitker boldy, dep habarlaıdy Kazinform agenttiginiń Vashıngtondaǵy menshikti tilshisi.
The Hill habarlaýynsha, Konservatıvtik saıası is-qımyl konferentsııasynyń (CPAC) jańa aldyn ala daýys berý qorytyndylaryna sáıkes, Vens Tehas shtatynyń Greıpvaın qalasynda ótken jyl saıynǵy sezde prezıdenttikke kandıdattardyń artyqshylyqtary boıynsha saýalnamaǵa qatysqandardyń shamamen 53%-ynyń qoldaýyna ıe boldy.
Memlekettik hatshy Marko Rýbıo 35% daýyspen ekinshi oryndy ıelense, Florıda gýbernatory Ron Desantıs pen prezıdenttiń uly kishi Donald Tramp 2% daýys jınap, úshinshi orynda turdy.
Senatorlar Ted Krýz (Tehas) jáne Rend Pol (Kentýkkı), qorǵanys mınıstri Pıt Hegset, Ulttyq barlaý dırektory Týlsı Gabbard jáne Tehas gýbernatory Greg Ebbott árqaısysy 1% daýys jınady. Tizimdegi birneshe kandıdat qoldaý taba almady.
Vens esiminiń tizimde birinshi turýy konservatıvti respýblıkashyldardyń ony prezıdent Tramptyń ornyna eń qolaıly kandıdat dep sanaıtynyn tanytyp otyr.
Ótken jyly Vens CPAC-tyń 1022 qatysýshysynyń arasynda 61% qoldaýmen kósh bastady, odan keıin Tramptyń burynǵy keńesshisi Stıv Bennon (12 paıyz) turdy.
2025 jyly Rýbıo tek 3% qoldaý alǵan, bul onyń Trampty jaqtaýshylar arasynda tanymaldyǵynyń artyp kele jatqanyn kórsetedi.
Senbidegi aldyn ala daýys berý qorytyndysy tańǵalarlyq jaıt emes edi. Sebebi Vens pen Rýbıo 2028 jylǵy saılaý aldynda Respýblıkalyq partııanyń kútiletin kóshbasshylary bolyp sanaldy. Donald Tramptyń saılaýǵa qaıtadan túsý quqyǵy joq.
Osyǵan deıin AQSh senatory Korı Býker prezıdenttikke úmitker bolýy múmkin ekenin málimdegenin jazdyq.
