AQSh Venesýelamen áskerı seriktestigin nyǵaıtpaq
ASTANA. KAZINFORM — AQSh Qorǵanys mınıstri Pıt Hegset Venesýelaǵa baryp, prezıdenttiń mindetin atqarýshy Delsı Rodrıgespen kezdesti, dep habarlaıdy Kazinform agenttiginiń menshikti tilshisi NBC News-ke silteme jasaı otyryp.
Hegset Venesýelamen jańa áskerı seriktestik ornatylatynyn málimdedi. Elder arasyndaǵy yntymaqtastyq týraly kelisim AQSh-qa Venesýela áskerı qyzmetshilerin oqytýǵa múmkindik beredi.
— Bolıvar ulttyq qarýly kúshterimizdiń daıyndyǵyn odan ári kúsheıtý, olardyń jabdyqtalýyn jaqsartý jáne jańa tehnologııalarǵa qol jetkizýdi jeńildetý múmkindigi bizdiń armııamyz úshin óte paıdaly, — dedi Delsı Rodrıges.
Hegset eki el arasyndaǵy áskerı yntymaqtastyqty tereńdetýge jáne esirtki saýdasymen kúresý úshin birlesip jumys isteýge úmittenetinin aıtty.
— Biz qorǵanys salasyndaǵy seriktestikti qalpyna keltirýdi jáne eki uly armııanyń birlese jumys isteý múmkindigin qarastyryp jatyrmyz, — dedi Pıt Hegset.
Tramp ákimshiligi Rodrıges úkimetimen jasalǵan energetıkalyq kelisimniń sharttaryna sáıkes Venesýela munaıyn satýdan túsken paıdanyń 12 mıllıard dollaryn nemese 99%-yn osy elge qaıtarǵanyn málimdedi.
Buǵan deıin Tramp AQSh pen Venesýela arasynda «tarıhı» munaı kelisimi jasalǵanyn málimdegen edi.