AQSh Venesýelada Nıkolas Madýrony ustaý operatsııasyn qalaı júrgizdi
Bir apta buryn Tramp telefon arqyly Madýromen tildeskende Venesýela basshysyna sońǵy múmkindik berip, otstavkaǵa ketýi kerektigin eskertti.
Bul kezde AQSh-tyń áskerı kemeleri Venesýela jaǵalaýynda ornalasqan bolatyn. TsRÝ toby elge enip, Madýronyń qımyldary men is-áreketterin baqylap otyrdy: qaıda uıyqtady, ne jedi jáne qaıda saıahattady.
Tramptyń aıtýynsha, Madýro táýekel etti, ol bárinen bas tartýǵa «jaqyn boldy», biraq óz ornynda qaldy.
Al, 2 qańtarda, saǵat 22:46-da Tramp «Absolıýttik sheshim» operatsııasyna buıryq berdi.
Basylymnyń habarlaýynsha, tamyz aıynda TsRÝ Madýronyń qozǵalysy týraly «egjeı-tegjeıli aqparat» alý maqsatynda Venesýelaǵa jasyryn túrde shaǵyn jasaq jibergen. Tipti onyń úı janýarlary amerıkalyq barlaý agentterine belgili boldy. Bul týraly senbi kúni baspasóz máslıhatynda Birikken shtabtar bastyqtarynyń tóraǵasy Den «Reızın» Keın aıtty.
Tramptyń Fox News-ke bergen suhbatynda elıtalyq áskerler birneshe aı boıy, sonyń ishinde AQSh jınaǵan barlaý málimetteri negizinde jasalǵan prezıdenttik keshenniń kóshirmesin paıdalaný arqyly jattyqqany aıtyldy. Buǵan deıin 2011 jyly Ýsama ben Ladendi óltirgen áskerler Pákistannyń Abbotabad qalasynda jattyǵýdan ótken bolatyn.
Venesýelaǵa jasalǵan shabýyldyń qupııa bolǵany sonsha, onyń naqty ýaqyty Pentagonda juma kúni keshke deıin belgili bolǵan joq. Ádette, mundaı áskerı operatsııanyń ýaqyty joǵary deńgeıde kelisiledi.
Karakastaǵy jel men bult shabýyldy birneshe kúnge keshiktirdi, biraq juma kúni aýa raıy jaqsardy. Aı tolysty, aspan ashyq boldy – ushqyshtar men ekıpajdar úshin qolaıly jaǵdaı týyndady.
Tramp túnniń bir ýaǵynda jáne tańerteń úıinde shabýyldy baqylap otyrdy.
Qurlyqtaǵy jáne teńizdegi 20 túrli bazadan kem degende 150 ushaq Karakasqa attandy. Flotqa barlaý jáne baqylaýǵa mamandanǵan bombalaýshy ushaqtar, ıstrebıtelder kirdi. Ekıpajdyń jasy – 20-dan 49-ǵa deıin.
AQSh artyqshylyqqa qol jetkizý úshin Karakasta elektr qýatyn óshirdi. Sýdan 30 metr bıiktikte ushqan tikushaqtar arnaıy jasaq pen quqyq qorǵaý qyzmetkerlerin jetkizip, Madýrony rezıdentsııasynan shyǵaryp jiberdi.
Senbi kúni tańǵy saǵat 1-ge taman amerıkalyq sarbazdar Karakastaǵy Madýro qamaýda otyrǵan keshenge jetti. Tramp ony «jaqsy nyǵaıtylǵan áskerı bekinis» dep atady.
Delta Force jasaqtary Madýronyń rezıdentsııasyna basyp kirgende, ol áıelimen birge Tramp bolat seıf dep sıpattaǵan bólmege qashýǵa árekettendi, biraq tym kesh boldy. Áskerıler Madýro men onyń áıeli Sılııa Floresti tutqynǵa aldy.
Madýro qolǵa túskennen keıin atys bastaldy, sol kezde amerıkalyq tikushaq atyp túsirildi. Atalǵan oqıǵadan eshbir amerıkalyq zardap shekken joq, biraq birneshe áskerı qyzmetker jaralanǵan. AQSh pen Aq úı sheneýnikteriniń aıtýynsha, barlyǵynyń jaǵdaıy turaqty.
Saǵat 3:30-da amerıkalyq áskerler elden aman-esen shyǵyp ketti. Shamamen bir saǵattan keıin Tramp bul jańalyqty álemge áleýmettik jeli arqyly jarııalady.
– Amerıka Qurama Shtattary tutqynǵa alynyp, áıelimen birge elden shyǵarylǵan Venesýelaǵa jáne onyń basshysy, prezıdent Nıkolas Madýroǵa qarsy keń aýqymdy operatsııany sátti júrgizdi, - dep jazdy Donald Tramp.
Saǵat 16:30-da Madýro Nıý-Iorkte boldy. Ol atalmysh qalanyń soltústigindegi Nıý-Vındzordaǵy Stıýart áýejaıyna keldi. Madýro angarǵa bara jatqanda ondaǵan tártip saqshylary onyń janynda júrdi. Sol kúni ol áıelimen birge Nıý-Iorktegi túrmege jetkizildi. Madýro dúısenbi kúni sot aldyna birinshi ret shyǵady dep kútilip otyr.
Eske sala keteıik, buǵan deıin Venesýela prezıdenti jubaıymen birge ustalyp, elden evakýatsııalanǵanyn habarlaǵanbyz. Sondaı-aq Venesýeladaǵy oqıǵaǵa baılanysty álem elderiniń reaktsııasyn da jarııaladyq.
Óz kezeginde AQSh Venesýela prezıdentin «narkoterrorızm» úshin aıyptady. Sonymen birge Venesýelaǵa qarsy áskerı operatsııaǵa 150 bombalaýshy, joıǵysh jáne barlaý ushaǵy qatysqanyn jazdyq.