AQSh Venesýela jaǵalaýynda taǵy bir munaı tankerin baqylaýǵa aldy
ASTANA. KAZINFORM — AQSh jaǵalaý kúzeti sanktsııalar tiziminde turǵan jáne Venesýelaǵa qatysty shekteýlerdi aınalyp ótýge tyrysqan «kóleńkeli flotqa» tıesili kemeni «belsendi túrde qýdalaýdy qolǵa aldy, dep habarlaıdy Al-Jazeera.
Amerıkalyq sheneýniktiń aıtýynsha, AQSh Venesýelaǵa jaqyn halyqaralyq sý aýmaqtarynda munaı tankerin qýdalap júr. Bul sońǵy eki kún ishindegi osyndaı ekinshi operatsııa jáne sońǵy eki aptaǵa jetpeıtin ýaqyt ishindegi úshinshi jaǵdaı bolyp otyr.
Jeksenbi kúni resmı ókil Al Jazeera telearnasyna bergen suhbatynda AQSh jaǵalaý kúzetiniń Venesýelanyń AQSh sanktsııalarynan jaltarýǵa tyrysatyn «kóleńkeli flotyna» kiretin dep sıpattalǵan kemeni «belsendi túrde qýdalaýdy jalǵastyryp jatqanyn» málimdedi.
Sheneýnik sondaı-aq bul kemeniń «arandatýshylyq áreketterge barǵanyn» jáne «sotpen shekteý qoıylǵanyn» ekenin aıtty.
Reuters agenttigi amerıkalyq sheneýnikke silteme jasap, tankerdiń sanktsııalar tiziminde turǵanyn habarlady. Alaıda agenttik ázirge keme bortyna eshkimniń kóterilmegenin jáne ustap alý áreketteri túrli formada júzege asýy múmkin ekenin atap ótti. Olardyń qataryna kúmán týdyratyn kemelerdiń mańynda júzip ótý nemese áýeden baqylaý da kiredi.
Resmı ókil operatsııanyń naqty qaı jerde júrgizilip jatqanyn jáne naqty qaı kemeniń qýdalanǵanyn ashyp aıtpady.
Degenmen, teńizdegi táýekelderdi basqarýmen aınalysatyn brıtandyq Vanguard toby bul kemeni Bella 1 ekenin aıtyp otyr. Ol — óte iri munaı shıkizatyn tasymaldaýshy tanker. AQSh Qarjy mınıstrligi ótken jyly bul kemeni Iranmen baılanysy bar dep sanap, sanktsııalar tizimine engizgen.
TankerTrackers.com derekterine sáıkes, jeksenbi kúni Bella 1 tankeri Venesýelaǵa jaqyndaǵan kezde bos bolǵan.
Reuters agenttigi Venesýelanyń memlekettik munaı kompanııasy PDVSA-nyń ishki qujattaryna silteme jasap, 2021 jyly bul kemeniń venesýelalyq munaıdy Qytaıǵa tasymaldaǵanyn habarlady. Sondaı-aq agenttik keme qozǵalysyn baqylaý qyzmetiniń derekterine súıene otyryp, buǵan deıin bul tankerdiń ırandyq munaıdy da tasymaldaǵanyn málimdedi.
Sońǵy operatsııa AQSh prezıdenti Donald Tramp jarııalaǵan «tosqaýyl» aıasynda senbi kúni AQSh Venesýela jaǵalaýynda munaı tankerin basyp alǵannan keıin júzege asyryldy.
Aıta keteıik, AQSh Venesýelanyń munaı tasymaldaıtyn 6 kompanııasyna sanktsııa saldy.