AQSh Venesýela jaǵalaýynda munaı tankerin basyp aldy

ASTANA. KAZINFORM – AQSh prezıdenti Donald Tramp amerıkalyq kúshterdiń Venesýela jaǵalaýynda munaı tankerin basyp alǵanyn málimdedi, dep habarlaıdy NBC News. 

– Biletin bolarsyz, jaqynda Venesýela jaǵalaýynda tankerdi basyp aldyq. Úlken, óte úlken, shyn máninde, biz basyp alǵan eń úlken tanker, - dep habarlady Donald Tramp.

Tramp tankerdiń basyp alynýy jáne oǵan qatysty bolashaq josparlar týraly egjeı-tegjeıli aıtqan joq. AQSh Bas prokýrory Pem Bondı tanker sanktsııalanǵan munaıdy tasymaldaý úshin paıdalanylǵanyn málimdedi.

– Venesýela jaǵalaýynda aıaqtalǵan bul basyp alý qaýipsiz júrgizildi jáne bizdiń sanktsııalanǵan munaıdy tasymaldaýdyń aldyn alý úshin Іshki qaýipsizdik mınıstrligimen birlesip júrgizip jatqan tergeýimiz jalǵasyp jatyr, - dep habarlady Bas prokýror Pem Bondı X-tegi jazbasynda. 

Bondı jazbasynda jarııalanǵan beınede AQSh áskerı qyzmetkerleriniń kemege palýbasynan birneshe metr bıiktikte qalqyp turǵan tikushaqtan arqanmen túsip jatqany kórsetilgen.

DW málimetinshe, Venesýela óz jaǵalaýynda tankerge shabýyl jasaýdy aıyptady. Venesýela Syrtqy ister mınıstrliginiń málimdemesinde bul oqıǵa «arsyz tonaý jáne halyqaralyq qaraqshylyq aktisi» dep sıpattaldy.

– Venesýelaǵa qarsy jalǵasyp jatqan agressııanyń shynaıy sebepteri qazir aıqyndala bastady. Másele kóshi-qonǵa baılanysty emes. Esirtki saýdasyna qatysty emes. Másele demokratııada emes. Onyń adam quqyqtaryna da qatysy joq. Másele bizdiń tabıǵı resýrstarymyz, munaıymyz, energetıkamyz – tek Venesýela halqyna tıesili resýrstarǵa qatysty, - delingen vedomstvo málimdemesinde.

Buǵan deıin AQSh Venesýela prezıdentin lańkestik uıymnyń kóshbasshysy dep sanaıtynyn jazǵan bolatynbyz.