AQSh Venesýela jaǵalaýynda esirtki tasymaldaýshylardyń kemesine soqqy jasady
ASTANA. KAZINFORM – AQSh Venesýela jaǵalaýyna jaqyn halyqaralyq sýlarda esirtki saýdasymen aınalysqan qylmystyq topqa tıesili kemege zymyran soqqysyn jasady, dep habarlaıdy Kazinform agenttigi.
Soqqy saldarynan kemede bolǵan tórt adam qaza tapty. Amerıkalyq áskerıler arasynda zardap shekkender joq.
Bul týraly AQSh Qorǵanys mınıstri Pıt Hegset óziniń H áleýmettik jelisindegi paraqshasynda habarlady.
— Búgin tańerteń prezıdent Tramptyń buıryǵymen AQSh Ońtústik qolbasshylyǵynyń jaýapkershilik aımaǵynda esirtki saýdasymen aınalysqan jáne terrorıstik uıymdarmen baılanysy bar kemege qarsy soqqy berýdi tapsyrdym, — dep jazdy ol.
Earlier this morning, on President Trump's orders, I directed a lethal, kinetic strike on a narco-trafficking vessel affiliated with Designated Terrorist Organizations in the USSOUTHCOM area of responsibility. Four male narco-terrorists aboard the vessel were killed in the… pic.twitter.com/QpNPljFcGn
— Secretary of War Pete Hegseth (@SecWar) October 3, 2025
Hegset atap ótkendeı, keme AQSh aýmaǵyna jetkizilmek bolǵan edáýir kólemdegi esirtki zattaryn alyp júrgen.
— Bizdiń barlaý qyzmeti esh kúmánsiz bul kemeniń esirtki tasymaldaǵanyn rastady. Kemede bolǵan adamdar esirtki terrorısteri edi, olar belgili kontrabandalyq baǵytpen júrgen. Bul soqqylar amerıka halqyna qarsy jasalǵan shabýyldar toqtaǵanǵa deıin jalǵasady, — dedi Pentagon basshysy.
Venesýela bıligi AQSh áskerı ushaqtarynyń eldiń áýe keńistigine kirip ketýine narazylyq bildirip, Pentagon basshysynan Latyn Amerıkasy men Karıb aımaǵyndaǵy beıbitshilikke qaýip tóndiretin «jaýapsyz áreketterdi» dereý toqtatýdy talap etti.
Karakas bul jaǵdaı týraly BUU Bas hatshysy Antonıý Gýterrıshke habarlaıtynyn da málimdedi.
Eske sala ketsek, buǵan deıin Donald Tramp AQSh-tyń esirtki kartelderine qarsy soǵys bastaǵanyn jarııalaǵan bolatyn.