Venesýela shıelenisi: AQSh-tyń ushaq tasymaldaýshy kemeleri Karıb teńizi aıdynyna endi

ASTANA. KAZINFORM — AQSh-tyń bir top ushaq tasymaldaýshysy Karıb teńiziniń aıdynyna endi, olardy álemdegi eń iri jáne eń jańa «Djerald Ford» ushaq tasýshy kemesi bastaǵan. Bul týraly AQSh flotynyń qolbasshylyǵy habarlady, dep jazdy VVS.

Prezıdent Donald Tramp topty osynda jiberý týraly buıryqty Venesýeladan taraıtyn esirtki tasymalyna qarsy kúres aıasynda bergenin málimdedi.

Pentagon Tramptyń sheshimi týraly 24 qazanda habarlaǵan. Ol kezde áýe tasymaldaýshylar toby Soltústik teńizde, Eýropa jaǵalaýynda ornalasqan edi.

AQSh floty men áskerı avıatsııasy sońǵy birneshe aıda Karıb teńizi men Tynyq muhıtynda esirtki tasymaldaýǵa qatysy bar delingen shaǵyn kemelerge soqqy jasap keledi. Resmı málimetke saı, osyndaı 19 operatsııa júrgizilip, keminde 76 adam qaza tapqan.

Venesýela prezıdenti Nıkolas Madýro men el basshylyǵy AQSh-tyń áreketin «bılikti qulatý úshin qoldan daǵdarys týdyryp otyr» dep aıyptady.

11 qarashada áýe tasymaldaýshylar toby AQSh-tyń Ońtústik qolbasshylyǵyna qarasty aımaqqa, ıaǵnı Karıb teńizi men Latyn Amerıkasyn qamtıtyn óńirge kirdi.

«Djerald Ford» áýe tasymaldaýshysynda ondaǵan joıǵysh ushaq ornalasqan. Ekıpaj ben ushý personalynyń jalpy sany 4,5 myńnan asady. Kemeni zymyrandy joıǵysh kemeler men ózge de áskerı jáne qoldaýshy kemeleri bastap júr.

Pentagon ókili Shon Parnelldiń aıtýynsha, áýe tasymaldaýshylar tobynyń Karıb teńizine kelýi AQSh-qa aımaqtaǵy esirtki tasymalyn tıimdirek baqylap, jolyn kesýge múmkindik beredi.

Buǵan deıin de AQSh Venesýela mańyna biraz áskerı kúshin shoǵyrlandyrǵan: Pýerto-Rıkoda 10 F-35 joıǵyshy tur, sondaı-aq aımaqta atomdyq súńgýir qaıyq pen segiz áskerı keme (úsh esmınets, bir kreıser, jaǵalaý kúzetiniń kemesi jáne úsh desanttyq keme) bar.

Eske sala keteıik, qazan aıynda AQSh-tyń eń iri áýe tasymaldaǵyshy Venesýelaǵa baǵyt alǵanyn habarlaǵanbyz.