AQSh Venesýela prezıdentin «narkoterrorızm» úshin aıyptady

ASTANA. KAZINFORM – Venesýela prezıdenti Nıkolas Madýro men onyń áıeli Sılııa Floreske narkoterrorızmge qatysty, atap aıtqanda kokaın ákelý, pýlemetter men jarylǵysh qurylǵylardy saqtaý, AQSh-qa qarsy pýlemetter men jarylǵysh qurylǵylardy ıemdený úshin sóz baılasý aıyptary taǵyldy.

Bul týraly AQSh bas prokýrory Pam Bondı málimdedi. 

— AQSh-tyń búkil Ádilet departamentiniń atynan men prezıdent Trampqa amerıkalyqtardyń atynan jaýapkershilikti talap etýdegi batyldyǵy úshin alǵys aıtqym keledi jáne atalǵan eki kúdikti halyqaralyq esirtki satýshysyn ustaýda sátti operatsııa jasaǵan bizdiń erjúrek áskerı qyzmetkerlerge rızashylyǵymdy bildirgim keledi, - dep jazdy ol áleýmettik jelide.

Buǵan deıin Venesýela vıtse-prezıdenti Delsı Rodrıges úkimette prezıdent Nıkolas Madýro men birinshi hanym Sılııa Florestiń qaıda ekeni týraly aqparat joq ekenin málimdegen. 

TeleSUR arnasynyń habarlaýynsha, vıtse-prezıdent el astanasy men Aragýa, Mıranda jáne La Gýaıra shtattaryna jasalǵan áskerı shabýyldy aıyptap, shabýyl saldarynan beıbit turǵyndardyń qaza tapqanyn málimdedi. 

Eske sala keteıik, buǵan deıin Venesýela prezıdenti jubaıymen birge ustalyp, elden evakýatsııalanǵanyn jazǵan edik.