AQSh Venesýela mańynda esirtki tıegen kemege oq atty

ASTANA. KAZINFORM - Amerıka Qurama shtattary esirtki tasymaldady degen kúdikpen Venesýela mańyndaǵy jaǵalaýda kemege oq jaýdyrdy. Bul týraly Aq úıde jýrnalıstermen bolǵan kezdesýde AQSh prezıdenti Donald Tramp málim etti, dep jazady reseılik TASS.

- Birneshe mınýt buryn ǵana biz mol kólemde esirtki tıelgen kemege oq attyq, - dedi ol kemeniń isten shyqqanyn qosyp.

Alaıda ol bolǵan oqıǵanyń búge-shigesine deıin aıtpady.

19 tamyz kúni Reuters agenttigi Pentagondaǵy derekkózine silteme jasaı otyryp, esirtki kartelderimen kúreske baǵyttalǵan operatsııalardy júrgizý úshin Karıb basseıniniń ońtústik bóligine, Venesýela jaǵalaýlaryna AQSh teńiz kúshteriniń 3 esmınetsin jibergeni týraly aqparat taratty.

Sonymen qatar atom súńgýir qaıyǵy men zymyran kreıseri, desant kemeleri men 4,5 myń áskerı qyzmetshiniń jiberilgeni habarlandy.

The New York Times basylymynyń jazýynsha, Tramp latynamerıkalyq esirtki kartelderine qarsy áskerı kúshti qoldaný dırektıvasyna qupııa túrde qol qoıǵan.

Vashıngton Venesýela prezıdenti Nıkolas Madýrony Cartel de los Soles esirtki karteline qatysy bar dep aıyptap otyr. Al Karakas mundaı karteldiń bar ekenin joqqa shyǵardy.

Osyǵan deıin AQSh Venesýeladaǵy teńiz kúshterin kúsheıtetini týraly jazdyq.