AQSh Venesýela kemesine taǵy soqqy jasady

ASTANA. KAZINFORM —  AQSh prezıdenti Donald Tramp Karıb teńiziniń halyqaralyq sýlarynda ekinshi kemege soqqy berilgenin málimdedi, dep habarlaıdy VVS.

Onyń aıtýynsha, bul shaǵyn keme Venesýelaǵa tıesili bolǵan jáne AQSh-qa esirtki tasymaldap bara jatqan.

Donald Tramptyń aıtýynsha, soqqy saldarynan úsh adam qaza tapqan. AQSh prezıdenti óziniń Truth Social áleýmettik jelisinde shaǵyn kemeniń áýeden túsirilgen vıdeosyn jarııalady. Vıdeoda kemeniń jarylyp ketkeni kórsetilgen.

— Búgin tańerteń meniń buıryǵymmen AQSh Qarýly kúshteri asa qaýipti esirtki kartelderi men esirtki lańkesterine qarsy ekinshi kınetıkalyq soqqy jasady, — delingen habarlamada.

Alaıda Tramp bul kemede naqty esirtki bolǵanyna dálel keltirmegen.

Bul málimdemeden buryn Venesýela prezıdenti Nıkolas Madýro AQSh agressııasynan qorǵanatyndaryn aıtyp, AQSh memlekettik hatshysy Marko Rýbıony «ólim men soǵystyń ámirshisi» dep ataǵan.

Osyǵan deıin qyrkúıek aıynyń basynda AQSh Venesýela mańynda esirtki tıegen kemege oq atqanyn jazǵanbyz.