AQSh ustanymyn ózgertse, Iran kelissózderdi qaıta bastaýǵa daıyn – Pezeshkıan
ASTANA. KAZINFORM – Iran prezıdenti Masýd Pezeshkıan AQSh ustanymy ózgergen jaǵdaıda Tegeran dıplomatııalyq kelissózderdi qaıta jalǵastyrýǵa daıyn ekenin málimdedi, dep habarlaıdy Anadolý agenttigi.
Iran úkimetiniń aqparattyq portalynda jarııalanǵan jazbasha málimdemege sáıkes, Pezeshkıan Japonııa premer-mınıstri Sanae Takaıtımen telefon arqyly sóılesti.
AQSh sheneýnikteriniń málimdemelerin «arandatýshylyq» dep ataǵan Iran prezıdenti el porttaryn buǵattaý áreketi qabyldanbaıtynyn jáne halyqaralyq quqyq normalaryna qaıshy keletinin aıtty. Onyń sózinshe, mundaı qadamdar aımaqtaǵy jaǵdaıdy odan ári ýshyqtyra túsedi.
Pezeshkıan Irannyń zańdy quqyqtaryn qorǵaýǵa daıyn ekenin atap ótip, óńirde beıbitshilik pen turaqtylyqty qamtamasyz etetin ádil sheshimge qol jetkizý úshin dıplomatııalyq úderisti jalǵastyrýǵa nıetti ekenin jetkizdi. Alaıda bul úderis AQSh tarapynan shekten shyqqan tásilder men arandatýshylyq áreketterdiń qashan toqtatylatynyna baılanysty ekenin aıtty.
Iran prezıdenti Parsy shyǵanaǵy men Ormýz buǵazy aımaǵyndaǵy turaqsyzdyqty AQSh pen Izraıldiń Iranǵa jasaǵan shabýyldarymen baılanystyrdy. Ol halyqaralyq teńiz qatynasyna qaýip tóndiretin áreketterge barlyq elder batyl túrde qarsy turýy tıis ekenin atap ótti.
Óz kezeginde Japonııa premer-mınıstri Takaıtı Taıaý Shyǵystaǵy shıelenisti beıbit jolmen retteý qajet ekenin aıtyp, dıalog pen konsýltatsııalar jaǵdaıdy turaqtandyrýǵa yqpal etetinine senim bildirdi.
Sondaı-aq ol Japonııa kemeleriniń Ormýz buǵazy arqyly ótýine ruqsat bergeni úshin Iranǵa alǵys aıtyp, buǵazda kútip turǵan basqa da kemelerdiń qaýipsiz ótýin qamtamasyz etýdi surady.
Takaıtı Iran men AQSh arasyndaǵy kelissózder jaqyn arada qaıta jandanyp, túpkilikti kelisimge ákeledi degen úmit bildirdi.
Eske sala ketsek, Irannyń joǵarǵy kóshbasshysy ózderiniń ıadrolyq jáne zymyran baǵdarlamalarynan bas tartpaıtynyn málimdedi.
