AQSh úshin mańyzdy paıdaly qazbalardyń jartysyna jýyǵy Qazaqstanda - Djýlı Stafft

ASTANA. KAZINFORM —  AQSh-tyń Qazaqstandaǵy elshisi laýazymyna úmitker Djýlı Stafft Amerıka Qurama Shtattarynyń ekonomıkasy men ulttyq qaýipsizdigi úshin mańyzdy dep tanylǵan mańyzdy paıdaly qazbalardyń jartysyna jýyǵy Qazaqstan aýmaǵynda bar ekenin málimdedi, dep habarlaıdy AQSh Senatynyń Halyqaralyq qatynastar jónindegi komıteti.

Bul týraly ol Senattyń Halyqaralyq ister jónindegi komıtetiniń tyńdaýynda málimdedi. Tyńdaý barysynda Montana shtatynyń senatory Stıv Deıns Qazaqstan ýran, lıtıı, mys, myrysh jáne sırek jer elementteri sııaqty AQSh pen álemdik ekonomıka úshin mańyzdy tabıǵı resýrstarǵa baı ekenin atap ótti. Osyǵan baılanysty senator Djýlı Staffttan onyń kandıdatýrasy bekitilgen jaǵdaıda, ol Qazaqstanǵa amerıkalyq ınvestıtsııany tartýǵa qalaı yqpal ete alatynyn surady.

- Qazaqstan biz úshin tek bıznes-seriktes retinde ǵana emes, mańyzdy paıdaly qazbalar salasyndaǵy yntymaqtastyq úshin de mańyzdy. Sebebi bul – saýda saıasatynyń máselesi ǵana emes, ulttyq qaýipsizdik máselesi. Meniń mindetim – amerıkalyq kompanııalardyń Qazaqstanǵa osy sektorǵa ınvestıtsııa salýyna jaǵdaı jasaý, – dep jaýap berdi Djýlı Stafft.

Buǵan deıin Djýlı Staffttyń AQSh-tyń Qazaqstandaǵy Tótenshe jáne ókiletti elshisi laýazymyna kandıdatýrasy Senatqa jiberilgenin jazǵan bolatynbyz.

Djýlı Stafft buǵan deıin AQSh-tyń Moldova, Djıbýtı, Reseı, Efıopııa jáne Polshadaǵy elshilikterinde jumys istegen. Sondaı-aq vızalyq qyzmetter jónindegi basqarýshy dırektor qyzmetin atqarǵan.