AQSh «ushatyn tárelke» týraly qupııa materıaldar jarııalady: astronavtar Aıda ne kórdi
ASTANA. KAZINFORM – AQSh Qorǵanys mınıstrligi PURSUE atty aqparatty qupııasyzdandyrý bastamasy aıasynda belgisiz ushatyn nysandarǵa (BUN) qatysty derekterdi turaqty túrde jarııalaı bastaıtynyn málimdedi. Tıisti habarlamany atalǵan mınıstrlik taratty.
Resmı málimdemede:
– Búgin Qorǵanys mınıstrligi BUN-dy baıqaý jaǵdaılary týraly prezıdenttik ashyqtyq jáne esep berý júıesi (PURSUE) aıasynda buryn jarııalanbaǵan jańa qujattardy ornalastyrýdyń alǵashqy kezeńi bastalǵanyn habarlaıdy. Bul vedomstvoaralyq baǵdarlama Aq úı, Ulttyq barlaý dırektorynyń keńsesi, Energetıka mınıstrligi, Barlyq saladaǵy anomalııalardy zertteý basqarmasy, NASA, FBI jáne AQSh barlaý qaýymdastyǵyndaǵy ózge qurylymdardyń kúshin biriktiredi, – delingen.
Vedomstvo ókilderi qupııasyzdandyrylǵan faıldarǵa Pentagonnyń resmı saıtyndaǵy arnaıy bólim arqyly qol jetkizýge bolatynyn túsindirdi.
– Soǵys mınıstrligi qujattardyń kelesi toptamalaryn turaqty negizde jarııalap otyrady, – dep qosty mınıstrlik.
Alǵashqy jarııalanǵan materıaldar paketine Apollo 17 mıssııasy kezinde túsirilgen arhıvtik fotosýretter, 2025–2026 jyldardaǵy áskerı baqylaý derekteri jáne áli kúnge deıin naqty túsindirilmegen birneshe oqıǵanyń sıpattamalary engen.
Qujattar arasynda Aı betinde túsirilgen fotosýretter de bar. Onda ártúrli kólemdegi jáne pishindegi jarqyraǵan núktelerge uqsas nysandar baıqalatyny aıtylǵan.
Sonymen qatar jarııalanǵan materıaldarǵa «Apollon» jáne Gemini 7 ǵarysh kemeleri ekıpajdarynyń radıobaılanys jazbalarynyń stenogrammalary engizilgen. Bul jazbalarda ekıpaj músheleri keme syrtynda baıqalǵan erekshe jaryq nysandaryn sıpattaıdy.
Keıbir kýálikterde baqylanǵan nysandardyń ǵarysh keńistiginde retsiz ári beıbereket qozǵalǵany aıtylǵan. Alaıda jarııalanǵan qujattarda bul qubylystardyń tabıǵatyna naqty túsinikteme berilmegen.
– Illıýmınatordyń ar jaǵynda kóptegen úlken jaryqtar tur. Olar óte tegis emes, buryshty bólshekterge uqsaıdy jáne keńistikte aınalyp júr, – delingen materıaldardyń birinde.
Bul aqparatty jarııalaý jospary týraly sáýir aıynyń sońynda AQSh prezıdenti Donald Tramp málimdegen edi. Onyń aıtýynsha, ol jaqynda amerıkalyq áskerı ushqyshtarmen BUN taqyrybyn talqylaǵan.
Tramptyń sózinshe, ushqyshtar ózderi «sený qıyn nárselerdi» kórgenin aıtqan.
Aıta keteıik, jýyrda NASA «Artemis II» mıssııasynyń Aıǵa qatysty 12 myń fotosyn jarııalady.
