AQSh ushaǵynyń qozǵaltqyshynan órt shyǵyp, shuǵyl qondy

ASTANA. KAZINFORM – FedEx júk ushaǵy áýege kóterilgen soń kóp uzamaı Nıýark Lıbertı (Nıý-Djersı) halyqaralyq áýejaıyna shuǵyl qondy, dep habarlaıdy Fox News arnasy.

Telearnanyń dereginshe, qozǵaltqyshtyń órtenýine quspen soqtyǵysý sebep bolǵan.

Kýágerlerdiń sózine qaraǵanda, oqıǵa kezinde qatty dybys estilgen.

Qaýipsizdik maqsatynda áýejaıdyń jumysy ýaqytsha toqtatyldy, biraq keıinirek qaıta jandandy. FedEx Indıanapolıske bet alǵan Boeing 767 ushaǵynyń áýege kóterilýi kezinde quspen soqtyǵysqanyn rastady.

AQSh-tyń Federaldyq avıatsııa ákimshiligi (FAA) oqıǵanyń mán-jaıyn anyqtap jatyr.

Buǵan deıin Kanadaǵa qonǵan Delta Air Lines ushaǵy aýdarylyp ketken bolatyn.