AQSh Úndi muhıtynda Iran munaıy tıelgen tankerdi ustady

ASTANA. KAZINFORM — AQSh áskerı kúshteri Úndi muhıtynda ırandyq M/T Tifani tankerin toqtatyp, munaı kontrabandasyna qatysy bolýy múmkin dep kúdiktendi. AQSh Qorǵanys mınıstrligi operatsııany teńizdegi baqylaý sharalary aıasynda júrgizilgenin jáne onyń «eshqandaı oqys oqıǵasyz» ótkenin rastady, dep jazdy BILD.

Vashıngton Tegeranǵa qysymdy kúsheıtip, Iranmen baılanysty nemese Iran úkimetine paıda ákelýi múmkin taýarlardy tasymaldaǵan barlyq kemelerdi toqtatýǵa baǵyttalǵan sharalardy jalǵastyryp otyr. Olardyń qatarynda munaı, metaldar, qarý-jaraq jáne elektrondyq jabdyqtar bar.

M/T Tifani tankeri Shrı-Lanka men Sýmatra aralynyń arasyndaǵy halyqaralyq sýlarda bolǵan. Ol AQSh pen Iran arasyndaǵy ýaqytsha bitim merzimi aıaqtalýǵa jaqyn kezde ustalǵan.

Pentagon sanktsııaǵa ilikken kemelerge qarsy áreketter jalǵasatynyn málimdedi. General Den Keınniń aıtýynsha, AQSh Iran týyn kótergen nemese Iranǵa kómektesetin barlyq kemelerdi, geografııalyq shekteýsiz, belsendi túrde qadaǵalap, toqtatýdy jalǵastyrady.

Buǵan deıin AQSh pen Irannyń Ormýz buǵazyndaǵy kıkiljińine baılanysty munaı baǵasy kóterilip jatqanyn jazdyq.