AQSh Ulttyq gvardııasynyń sarbazyna oq atqan kúdiktiniń jeke basy anyqtaldy

ASTANA. KAZINFORM — FTB qyzmetkerleri Ulttyq gvardııanyń eki sarbazyna shabýyl jasady degen kúdikke ilingen er adamnyń esimin anyqtady, dep CNN-ge silteme jasap, BBC jazdy. Quqyq qorǵaý organdarynyń birneshe qyzmetketeri tergeýmen tanys ekeni aıtyldy.

Olardyń aıtýynsha, atys jasaǵan adamnyń jeke basy týraly alǵashqy aqparat Vashıngton shtatynan kelgen, 2021 jyldyń tamyz aıynda Aýǵanstannan sol jerge kóship kelgen er adamnyń jeke basyna sáıkes keledi.

Bir derekkózdiń habarlaýynsha, bılik ustalǵan adamnyń saýsaq izderin teksergen, biraq onyń jeke basyn rastaý úshin áli de jumys istep jatyr.

CBS telekompanııasy kúdiktiniń sonymen qatar Aýǵanstan týmasy bolýy múmkin ekenin habarlaıdy. Onyń derekkózderiniń málimetinshe, ol 29 jasta.

Tramp Ulttyq gvardııa sarbazdaryna jasalǵan shabýyldy «lańkestik akt» dep atady.

Shabýyldan Ulttyq gvardııanyń eki qyzmetkeri jaraqat aldy, olardyń jaǵdaıy óte aýyr, shabýyldaýshy da aýyr jaraqat alǵan.

Tramptyń aıtýynsha, AQSh Іshki qaýipsizdik mınıstrligi shabýyldaýshynyń AQSh-qa 2021 jyly Aýǵanstannan kelgenine senimdi (AQSh BAQ bul týraly buryn derekkózderge silteme jasaı otyryp habarlaǵan).

— Bul bizdiń búkil halqymyzǵa qarsy qylmys boldy. Bul — adamzatqa qarsy qylmys, — dedi ol.

Tramp sonymen qatar AQSh bıligi burynǵy Djo Baıden ákimshiligi kezinde Aýǵanstannan elge kirgen árbir adamdy tekserýi kerek dep málimdep, óziniń aldyndaǵy prezıdentti taǵy synǵa aldy.

Amerıka kóshbasshysy sonymen qatar Pentagon hatshysy Pıt Hegsetke Vashıngtonǵa Ulttyq gvardııanyń qosymsha 500 qyzmetkerin jiberýdi tapsyrǵanyn rastady.

— Biz Amerıkany qaıtadan tolyqtaı qaýipsiz etemiz, — dep qosty ol arnaıy qyzmetterge alǵysyn bildirip.

Eske sala ketsek, Aq úıdiń mańynda AQSh Ulttyq gvardııasynyń áskerı qyzmetkerlerine oq atylǵan. Polıtsııa kúdiktiniń ustalǵanyn habarlady.