AQSh Ulttyq barlaý dırektory Týlsı Gabbard qyzmetinen ketedi
ASTANA. KAZINFORM – AQSh Ulttyq barlaý dırektory Týlsı Gabbard 30 maýsymda qyzmetinen ketetinin málimdedi, dep habarlaıdy BBC.
Onyń aıtýynsha, bul sheshim kúıeýiniń sırek kezdesetin súıek qaterli isigine shaldyǵýyna baılanysty qabyldanǵan.
– Qazirgi ýaqytta men kúıeýimniń janynda bolyp, osy synaqta oǵan barynsha qoldaý kórsetý úshin memlekettik qyzmetten ýaqytsha ketýge májbúrmin, – dep jazdy Gabbard X áleýmettik jelisinde.
Sondaı-aq ol AQSh prezıdenti Donald Tramp tarapynan kórsetilgen senim úshin alǵys bildirgen.
– Sońǵy bir jarym jyl ishinde Ulttyq barlaý dırektory qyzmetine ıe bolǵanyma rızamyn, – dedi ol.
Gabbard óz málimdemesinde Ulttyq barlaý basqarmasynda «aıtarlyqtaı ózgeristerge qol jetkizgenin» atap ótti.
– Biz buryn-sońdy bolmaǵan ashyqtyqty qamtamasyz etip, barlaý qaýymdastyǵyna degen senimdi qalpyna keltirdik, – dedi ol.
Sonymen qatar ol aldaǵy aptalarda bılik aýysý protsesin muqııat uıymdastyrýǵa kúsh salatynyn aıtty.
Óz kezeginde Donald Tramp Gabbardtyń orynbasary Aaron Lýkas ýaqytsha dırektor qyzmetin atqaratynyn málimdedi.
– Týlsı tamasha jumys atqardy, biz ony saǵynamyz. Onyń kúıeýi Abrahamnan jaqynda sırek kezdesetin súıek qaterli isigi anyqtaldy. Sondyqtan onyń janynda bolǵysy keletini túsinikti, – dep jazdy Tramp Truth Social jelisinde.
Aıta keteıik, AQSh-tyń Slovenııadaǵy elshisi laýazymyna alǵash ret qazaq qyzy taǵaıyndaldy.
