AQSh Ýkraınaǵa qarý-jaraq jetkize bastady – Tramp

ASTANA. KAZINFORM — AQSh prezıdenti Donald Tramp Ýkraınaǵa NATO arqyly aýqymdy kólemde qarý-jaraq jetkizilip jatqanyn málimdedi. Bul týraly The New York Times pen First Channel News habarlady.

— Patriot zymyrandary jetkizildi. Biz aptasyna 5–6 myń sarbazdyń ómirin saqtap qalýdamyz. Bul – reseılik jáne ýkraınalyq sarbazdar, – dedi AQSh prezıdenti Donald Tramp.

Onyń aıtýynsha, jańa kelisim AQSh úshin tıimdi. Alaıda kelisimniń naqty qalaı júzege asatyny ázirge jarııalanǵan joq.

— Bul – óte mańyzdy mámile. Biz álemdegi eń úzdik áskerı jabdyqty usynamyz, al álemniń baı elderi ony satyp alýǵa daıyn, – dep málimdedi Tramp.

NATO Bas hatshysy Mark Rıýtte keminde segiz eldiń Ýkraınaǵa qarý-jaraq satyp alýǵa qarjy bóletinin atap ótip, Donald Tramptyń Ýkraınaǵa qajetti quraldardy jetkizýge járdemdeskenin joǵary baǵalady.

— Bul úshin eýropalyqtar tóleıdi, bul – oryndy sheshim, – dedi Rıýtte.

Seısenbi kúni Tramp AQSh-tyń Ýkraınaǵa alys qashyqtyqtaǵy zymyrandardy jiberý jospary joq ekenin de aıtty.

Sonymen qatar, Tramp pen Rıýtte jańa kelisim aıasynda Ýkraınaǵa qosymsha amerıkalyq Patriot áýe shabýylyna qarsy qorǵanys júıeleri jetkiziletinin rastady. Germanııa eki júıeni satyp alýǵa daıyn ekenin bildirse, Norvegııa úshinshi júıeni usyndy. Tramptyń aıtýynsha, bir belgisiz el óziniń 17 Patriot júıesin satýǵa ázir. Bul 2020 jyly amerıkalyq Raytheon kompanııasy Shveıtsarııaǵa satýǵa kelisken 17 ushyrý qondyrǵysy bolýy múmkin.

AQSh bul kelisimnen qansha paıda tabady?

Patriot júıesiniń bir batareıasynyń quny modelge qaraı shamamen 1 mlrd dollardy quraıdy. Al zymyran qaǵýshynyń bir danasy - 3,7 mln dollar, JASSM zymyrandary - 1,5 mln dollar, ATACMS zymyrandary keminde 1 mln dollar turady.

Aıta keteıik, buǵan deıin Ýkraına prezıdenti Vladımır Zelenskıı Donald Trampqa elin qoldaýǵa daıyn bolǵany úshin alǵys bildirgen bolatyn.