AQSh Ýkraınaǵa 15 jyldyq qaýipsizdik kepildigin usyndy

ASTANA. KAZINFORM – AQSh Ýkraınaǵa 15 jylǵa qaýipsizdik kepildigin berýi múmkin. Biraq Kıev uzaq merzimdi kepildik surap otyr, dep habarlaıdy DW.

Ýkraına prezıdenti Vladımır Zelenskıı bul týraly Axios-qa málimdedi.

AQSh prezıdenti Donald Tramppen kelesi kezdesýi jarııalanar kezge eki kún qalǵanda Ýkraına prezıdenti Vladımır Zelenskıı óz eline 15 jylǵa qaýipsizdik kepildigin berý týraly usynys jasady. Bul merzim uzartylýy da múmkin.

– Meniń oıymsha, bizge 15 jyldan artyq ýaqyt qajet, - dedi Zelenskıı.

Ýkraına basshysy Tramp aldaǵy kezdesýinde buǵan kelisse, muny «úlken jetistik» dep sanaıtynyn qosa aıtty.

– Eki el de qaýipsizdik kepildigin ratıfıkatsııalaý úshin zań shyǵarýshy organdaryna usynady, - dedi Zelenskıı. 

Ol AQSh-Ýkraına ekijaqty kelisimderiniń kóptegen aspektisi qazirdiń ózinde kelisilgenin jáne 5 qujatta kórsetilgenin, oǵan altynshysy qosylýy múmkin ekenin qosa jetkizdi. 

Zelenskıı sondaı-aq Eýropa elderiniń Ýkraınanyń qaýipsizdigin qamtamasyz etýge qatysýy týraly qujat jasaý bastamasyn eske saldy. Frantsııa men Ulybrıtanııaǵa bul tusta jetekshi ról júkteldi. 

Basylym sonymen qatar Ýkraına prezıdentiniń 28 jeltoqsanda AQSh prezıdentimen kelissóz barysynda qaqtyǵysty sheshý sharttary boıynsha kelisýge úmittenetinin atap ótti. Zelenskıı sonymen qatar Reseı kem degende 60 kún boıy atysty toqtatýǵa kelisse, «beıbitshilik josparynyń» erejelerin búkilhalyqtyq daýys berýge usynýǵa daıyn.

Ýkraına prezıdentiniń aıtýynsha, bul referendým ótkizý úshin qajetti mólsher, ony uıymdastyrý «saıası, logıstıkalyq jáne qaýipsizdikke baılanysty qıyndyqtardy» týdyrady.

Ol qaýipsizdik kepildigi tek parlament tolyq ratıfıkatsııalaǵannan nemese referendým arqyly bekitilgennen keıin ǵana kúshine enetinin sóz etti.

Aıta keteıik, Zelenskıı men Tramp 28 jeltoqsanda kezdesedi.