AQSh Ýkraınadaǵy jaǵdaıdy retteý jumystaryn toqtatýy múmkin - Marko Rýbıo
ASTANA. KAZINFORM – AQSh Memlekettik hatshysy Marko Rýbıo Parıjde Ýkraına boıynsha kópjaqty kelisssózder júrgizgen soń osyndaı málimdeme jasady, dep habarlaıdy Kazinform menshikti tilshisi.
Politico basylymynyń jazýynsha, AQSh Memlekettik hatshysy Ýkraınadaǵy jaǵdaıdy retteý boıynsha naqtyraq jaýaptardy kelesi aptada Londonda ótetin kezdesý barysynda alam degen úmitte.
Eger bul iste qandaı da bir jetistik bolmasa Qurama Shtattar bul problemamen aınalysýdy toqtatýy múmkin, delingen eýropalyq basylymdaǵy materıalda.
- Biz keshe jaqsy kezdesý ótkizdik. Menińshe, Frantsııa, Ulybrıtanııa, Germanııamen kelissóz nátıjeli, óte paıdaly boldy. Biz olarǵa osy kezdesý úshin alǵys aıtamyz. Men kelesi aptanyń basynda taǵy bir kezdesý ótkizemiz jáne onda nátıjege qol jetkizýge qanshalyqty jaqynbyz degen másele tóńireginde naqty jaýap alamyz degen oıdamyn. Bul isti sozbalańǵa salyp júre bermeımiz, - dep málimdedi Rýbıo Frantsııadan ushar aldynda.
Ýkraına boıynsha kelissózder kelesi aptada Londonda ótedi, ýaqyty ázirge belgisiz.
Rýbıo ol kezdesýge kimder qatysatynyn ázirge bilmeıtinin, alaıda, eger onyń nátıjeli bolatynynan úmit bolsa ózi qatysýǵa daıyn ekenin aıtty.
Onyń sózinshe, shıelenisti aıaqtaý múmkin nemese múmkin emestigin jaqyn aptada emes, jaqyn kúnderi bilýge tyrysý qajet. Eger ol múmkin bolsa AQSh oǵan kúsh salýǵa daıyn.
Memhatshynyń sózinshe, eger taraptar kelisýge daıyn emes bolsa, prezıdent Donald Tramp bul isti toqtatatynyn málimdeýi múmkin.
- Biz bul iske qansha ýaqyt qajet bolsa sonsha qatysýǵa daıynbyz, degenmen ol sheksiz bolmaýy tıis. Eger bolmaıtyn bolsa bizge basqa jumystarmen aınalysý kerek,- dedi Rýbıo.
Men birneshe apta týraly aıtyp turmyn, bul isti aldaǵy birneshe aptada júzege asyra alamyz ba ?. Eger ol múmkin bolsa, onda biz oǵan qatysamyz, eger múmkin bolmasa bizdiń nazarǵa alýymyz kerek basqa basymdyqtarymyz bar.
Marko Rýbıo beısenbi kúni atysty toqtatý týraly kelissózderdi Frantsııa prezıdenti Emmanıýel Makronmen jáne Germanııa, Ýkraına men Ulybrıtanııanyń joǵary deńgeıdegi delegatsııalarymen ótkizý úshin Frantsııa astanasyna arnaıy elshi Stıv Ýıtkofpen jáne Keıt Kellogpen bardy.
Makron keńsesi kezdesýdi «eýropalyqtar qatysqan úmit kúttiretin protses retinde» baǵalady jáne olar talqylaýlar kelesi aptada Londonda jalǵasatynyn aıtty.