AQSh, Ýkraına jáne Reseı kelissózderi: kelesi kezdesý 1 aqpanǵa josparlanǵan

ASTANA. KAZINFORM — Reseı, AQSh jáne Ýkraına ókilderi qatysatyn kelissózderdiń kelesi raýndy Abý-Dabıde 1 aqpanda jalǵasady, dep habarlaıdy Reuters.

Agenttik esimin atamaýdy jón kórgen amerıkalyq sheneýniktiń aıtýynsha, taraptar burynǵy kezdesýlerde ózara qurmet kórsetip, sheshim tabýǵa tyrysqan. Talqylaýda kelisimderdiń egjeı-tegjeıli aspektileri qozǵaldy jáne kelesi jeksenbige josparlanǵan kezdesý mámileniń sońǵy kezeńine ótýge baǵyttalǵan. 

Axios jýrnalısi Barak Ravıd kezdesýdiń ýaqytyn rastady. Ol úshjaqty kelissózdiń qaıta jandanýy Máskeý men Kıev arasyndaǵy dıalogtaǵy ilgerileýshilikti kórsetetinin atap ótti. Onyń aıtýynsha, Ýkraına ókilderi konsýltatsııalardy oń jáne syndarly dep baǵalady.

Reuters aqparat kózi qaqtyǵystan keıin Ýkraına úshin ázirlenetin qaýipsizdik hattamalary «óte berik» bolatynyn atap ótti.

Eske sala keteıik, Abý-Dabıde Reseı, Ýkraına jáne AQSh arasyndaǵy úshjaqty konsýltatsııalardyń ekinshi kúni taraptardyń resmı málimdemelerinsiz aıaqtaldy.