AQSh Ýkraına men Reseı kelissózderine qatysý ne qatyspaý týraly sheshimdi osy aptada qabyldaıdy

ASTANA. KAZINFORM – AQSh Memlekettik hatshysy Marko Rýbıo Ýkraına men Reseı arasyndaǵy beıbitshilik týraly kelisimge jaqyn arada qol qoıylýy kerek ekenin aıtty. Eger olaı bolmasa Vashıngton kelissózder protsesinen shyǵady, dep jazady VVS.

- Bul is tez arada júzege asyrylýy kerek. Eger nátıje bolmasa biz odan ári oǵan bekerden beker ýaqyt pen resýrstardy shyǵyndaı almaımyz, -dedi AQSh Memlekettik departamentiniń basshysy amerıkalyq NBC telekompanııasynyń «Meet the Press» baǵdarlamasyna bergen suhbatynda.

- Bul apta óte mańyzdy bolady, sebebi biz osy ýaqyt aralyǵynda osy bastamaǵa qatysamyz ba, joq ózge máselelerdi nazarǵa alamyz ba, degen suraq boıynsha tıisti sheshim qabyldaýymyz kerek.

Rýbıo osyǵan deıin de eger naqty nátıje shyqpaıtyn bolsa, AQSh Ýkraınada beıbitshilik ornatý isine umytylysyn toqtatady, dep birneshe márte qorqytqan bolatyn. Degenmen ol atalǵan másele boıynsha osy aptada sheshim qabyldanady dep alǵash ret málimdedi.

BAQ málimetteri boıynsha, AQSh Reseı men Ýkraınaǵa jaǵdaıdy beıbit retteý týraly jospar usynǵan. Oǵan sáıkes, qazirgi maıdan shebi osy jerden toqtaıdy. Kıev bolsa NATO-ǵa kirý úmitinen qol úzedi, al Vashıngton Reseıdiń Qyrymdy anneksııalaǵanyn jáne Ýkrınanyń okkýpatsııalanǵan aımaqtaryna baqylaý ornatatynyn zańdy túrde moıyndaıdy. Ol úshin Ýkraına qaýipsizdigine kepildik berý kerek (qujatta ol týraly eshqandaı málimet joq).

BAQ-taǵy derekkózderdiń habarlaýynsha, buǵan jaýap retinde Ýkraına men onyń eýropalyq odaqtastary ózderiniń josparyn usyndy. Onda Kıevke qaýipsizdik kepildigi berilip, eldi «muzdatylǵan» reseılik aktıvter esebinen qalpyna keltirý máselesi qamtylǵan.

Buǵan Reseıdiń kózqarasy qalaı ekeni ázirge habarlanǵan joq.

Osyǵan deıin Tramp Reseı men Ýkraına arasyndaǵy beıbit kelisim boıynsha jumys sátti júrip jatqany týraly aıtty.

Zelenskıı Eýrokomıssııa jáne Frantsııa, Ulybrıtanııa, Italııa basshylarymen kezdesti.