AQSh Ýkraına máselesine qatysty úshjaqty kelissózdi qaıta jandandyrmaq
ASTANA. KAZINFORM — AQSh Ýkraınadaǵy jaǵdaıǵa baılanysty Máskeý, Kıev jáne Vashıngtonnyń qatysýymen ótetin úshjaqty kelissózdi qaıta jandandyrýǵa nıetti. Bul týraly Kazinform agenttigi CNN-ge silteme jasap habarlady.
Bul málimdemeni Reseı men Ýkraınaǵa jasaǵan saparynan soń AQSh prezıdenti Donald Tramptyń kúıeý balasy Djared Kýshner jasady.
— Biz Stıv ekeýimiz (Ýıtkoff — red.) shamamen alty aı buryn qoldanǵan úshjaqty kelissóz formatyna qaıta oralý tıimdi dep sanaımyz, — dedi ol Kıevtegi kelissózderden keıin ótken baspasóz máslıhatynda.
Kýshnerdiń aıtýynsha, AQSh bul ıdeıany eki tarappen de talqylaǵan jáne «jaqyn arada bul baǵyttaǵy kelisim aıtarlyqtaı ilgerileıdi».
Sonymen qatar, kezdesýlerge Kýshnermen birge qatysqan AQSh prezıdentiniń arnaıy ókili Stıv Ýıtkoff «ońtaıly sheshimge qol jetkizýge bolady» degen senimin bildirdi.
Eske sala keteıik, ótken apta sońynda AQSh prezıdentiniń arnaıy ókili Stıv Ýıtkoff pen Djared Kýshner Kremlde Reseı prezıdenti Vladımır Pýtınmen kezdesti.
Keıin olar Kıevke baryp, Ýkraına prezıdenti Vladımır Zelenskıımen kelissóz júrgizdi.
Ýkraına prezıdenti keńsesiniń basshysy Kırıll Býdanovtyń aıtýynsha, Kıevte Ulybrıtanııa, Frantsııa jáne Germanııa ókilderi de bolǵan.
Zelenskııdiń ózi Ýkraına, Eýropa jáne AQSh jaqyn arada qaıta kezdesý ótkizýdi josparlap otyrǵanyn málimdedi.
