AQSh úkimeti halyqaralyq kómek pen BAQ-qa bólinetin qarjyny qysqartady
ASTANA. KAZINFORM — AQSh Senaty USAID pen buqaralyq aqparat quraldaryn qarjylandyrýdy 9 mlrd dollarǵa qysqartýdy maquldady, dep habarlaıdy Kazinform tilshisi FOX News-ke silteme jasap.
AQSh Senatyndaǵy respýblıkashyldar demokrattardyń jáne ishki oppozıtsııanyń qarsylyǵyna qaramastan, prezıdent Donald Tramp usynǵan 9 mlrd dollardy qaıtarý týraly sharalar paketin qabyldady.
Zań jobasy Senatta az ǵana basymdyqpen – 51 daýys «qoldap», 48 daýys «qarsy» bolyp qabyldandy. Endi qujat jumaǵa deıin qabyldanýy úshin Ókilder palatasyna joldanady.
Zań jobasynda Halyqaralyq damý jónindegi AQSh agenttiginiń (USAID) qarjylandyrýyn shamamen 8 mlrd dollarǵa jáne Ulttyq qoǵamdyq radıo (NPR) men Qoǵamdyq telehabar taratý qyzmetin (PBS) qarjylandyratyn Qoǵamdyq habar taratý korporatsııasynyń qarjylandyrýyn 1 mlrd dollarǵa qysqartý kózdelgen. Bul qarajattar buryn Kongress tarapynan maquldanǵan bolatyn.
Respýblıkashyldar bul zań jobasyn federaldy úkimettegi ysyrapshyldyqpen, alaıaqtyqpen jáne zańsyzdyqtarmen kúrestiń jalǵasy retinde tanystyryp otyr.
Buǵan deıin AQSh Áskerı-áýe kúshteri Memlekettik basqarý tıimdiligi departamentimen (DOGE) birlesip jumys isteý nátıjesinde 10,4 mlrd dollardan astam qarajatty únemdegenin málimdegen bolatyn.