AQSh-tyń Jaǵalaý kúzeti «Tıtanıkke» súńgigen batıskaftyń barlyq ekıpajy mert bolǵanyn habarlady
ASTANA. QazAqparat – Aldyn ala málimetterge sáıkes, «Tıtan» batıskafy jarylǵan, dep habarlaıdy QazAqparat BBC News agenttigine silteme jasap.
18 maýsymda Atlant muhıtyna batyp ketken Tıtanık laınerine súńgý kezinde joǵalyp ketken «Tıtan» batıskafynyń synyqtary tabyldy. Bortta bolǵan bes adam qaza tapqan.
AQSh-tyń Jaǵalaý kúzetiniń habarlaýynsha, kanadalyq Horizon Arctic kemesinen muhıtqa túsirilgen Odysseus sýasty apparaty batıskaftyń artqy bóligin, sonymen qatar 3 800 metr tereńdikte jatqan «Tıtanık» kemesiniń aldyńǵy jaǵynan shamamen 500 metr jerden basqa da bólikterin tapqan.
Qırandylar apatty jaǵdaı bolǵanyn kórsetedi. Biraq, oǵan ne sebep bolǵany belgisiz. Sonymen qatar qaza tapqandardyń múrdesi tabylý-tabylmaýy da neǵaıbyl.
«Bul óte qatal orta», - dep málimdedi AQSh-tyń Jaǵalaý kúzetiniń kontr-admıraly Djon Moger Bostonda ótken baspasóz máslıhatynda.
Eske sala keteıik, qutqarýshylar Atlant muhıtynyń soltústik bóliginde joǵalyp ketken súńgýir qaıyqty izdep jatqan edi.
Bortynda 5 adam (Frantsııa, AQSh, Ulybrıtanııa jáne Pákistan azamattary) bar shaǵyn «Tıtan» (Titan Sub) qaıyǵy Soltústik Atlantıkadaǵy sýǵa batqan «Tıtanık» kemesimen tanysý úshin 4 myń metr tereńdikke súńgip ketken.
Titan Sub – OceanGate kompanııasyna tıesili shaǵyn sýasty apparaty. Salmaǵy – 10 tonna, uzyndyǵy – 6,7 metr.
Syıymdylyǵy bes adammen shekteletin apparat 96 saǵatqa tereńge boılaı alady.
Osyǵan deıin apatqa ushyraǵan qaıyqtyń qırandylary tabylǵany týraly habarlaǵan bolatynbyz.
