AQSh-tyń Ýıtınsvıll provıntsııasynda amerıkalyq otbasymen asyrap alynǵan qazaqstandyq balalardyń taǵdyry jiti baqylaýda tur - B.Jumaǵulov

ASTANA. 2 tamyz. QazAqparat - QR Bilim jáne ǵylym mınıstrligi AQSh-tyń Ýıtınsvıll provıntsııasynda amerıkalyq otbasymen asyrap alynǵan qazaqstandyq balalardyń taǵdyryn jiti baqylaýda ustaýda. Bul týraly búgin baspasóz máslıhatynda QR Bilim jáne ǵylym mınıstri Baqytjan Jumaǵulov málim etti.

«Onymen QR BǴM Balalar quqyǵy jónindegi komıtet tyǵyz aınalysyp jatyr. Qazaqstandyq balalardyń taǵdyryna qatysty bolǵandyqtan ózimizge qatty tıedi», - dedi mınıstr tilshilerdiń saýalyna jaýap qaıyrý kezinde.

«Qazirgi ýaqytta biz barlyq materıaldardy QR Syrtqy ister mınıstrligine, olardyń konsýldyq basqarmalaryna berdik. Sheteldegi bizdiń elshilikke de tapsyrma berdik. Biz jaǵdaıdy jiti baqylaýda ustap otyrmyz. Sottyń aıaǵy nemen bitetinin kútip otyrmyz», - dedi B.Jumaǵulov.

Eske sala keteıik, AQSh-ta asyrap alynǵan balalardy zorlaý faktisi boıynsha olardyń asyraýshylaryna qatysty qylmystyq is qozǵaldy. Sot protsesi áli aıaqtalǵan joq. Ýtınsvıll provıntsııasynyń turǵyndary 50 jastaǵy Djozef Meıott pen onyń 49 jastaǵy zaıyby Lındaǵa 26 pýnkt boıynsha aıyptar taǵyldy. Onyń ishinde 14 jasqa tolmaǵan balany zorlaý, ıntsest aıyptary da bar. Aıta keteıik, 2010 jyly bul is sotta qaralyp, keıin toqtatylǵan bolatyn. Qazirgi ýaqytta bul is qaıta qozǵalyp otyr. Qazaqstandyq balalar Ýtınısvıllge 2004 jyly kóship barǵan bolatyn. Ol kezde er bala 13 jasta bolsa, qyz bala 8 jasta edi.

«2004 jyly Petropavl qalalyq sotynyń sheshimimen osy balalar AQSh azamattaryna tárbıelenýge berilgen. Sodan keıin on jylǵa jýyq ýaqyt ótti. Sizderge aıta keteıik, 2010 jyldan bastap biz shetelge balalardy jiberip jatqanymyz joq. 2011 jyldan beri Qazaqstanda tıisti normatıvtik zańdar qabyldandy», - dep atap ótti B. Jumaǵulov.