AQSh-tyń transulttyq kompanııasy elordalyq saýdagerdiń ústinen shaǵym túsirdi
ASTANA. QazAqparat - Astana qalalyq ádilet departamentine «The Proctel & Gamble Company» kompanııasynyń ókili shaǵymdanyp, Astanadaǵy «BIG Shanhaı» saýda úıindegi taýarlarǵa tekseris ótkizýdi surady, dep habarlaıdy QazAqparat tilshisi.
Tekseris kezinde turmystyq hımııa ónimderin satýmen aınalysatyn bir jeke kásipkerdiń tártip buzǵany anyqtaldy. Onyń saýda alańynda kontrafaktilik taýarlar satyldy. Atap aıtqanda, ydys-aıaq jýýǵa arnalǵan «Fairy» atty ónimniń shtrıh-kody astyndaǵy tsıfrlar anyq basylmaǵan. Ondaı taýarlar kontrafaktige jatady.
«Astana qalasynyń mamandyrylǵan aýdanaralyq ákimshilik soty jeke kásipkerdi Ákimshilik quqyq buzýshylyq týraly kodekstiń 158-baby boıynsha jaýapkershilikke tartyp, 21 AEK (50 505 teńge) kólemindegi aıyppuldy tóleýge mindettedi. Kontrafaktilik taýardyń barlyǵy memlekettiń paıdasyna tárkilendi. Sot qaýlysy zańdy kúshine endi», - delingen sottyń resmı habarlamasynda.
