AQSh-tyń Saýda mınıstri Ýılber Ross Qazaqstanǵa kele jatyr
ASTANA. QazAqparat - 24-25 qazan aralyǵynda AQSh-tyń Saýda mınıstri Ýılber Ross Qazaqstanda bolyp, Memleket basshysy jáne Úkimet múshelerimen kezdesedi. Bul týraly QR SІM-de ótken baspasóz máslıhatynda vedomstvonyń resmı ókili Aıbek Smadııarov málim etti, dep habarlaıdy QazAqparat tilshisi.
«Qazaqstan Prezıdenti Nursultan Nazarbaevtyń 2018 jyldyń qańtar aıynda AQSh-qa resmı saparynyń nátıjesinde qol jetkizilgen ýaǵdalastyqtarǵa sáıkes ústimizdegi jyldyń 24-25 qazan aralyǵynda AQSh-tyń Saýda mınıstri Ýılber Rosstyń Qazaqstanǵa sapary bolady. Sapar sheńberinde Qazaqstan-AQSh arasyndaǵy saýda-ekonomıkalyq jáne ınvestıtsııalyq yntymaqtastyq perspektıvalaryn talqylaý josparlanýda. Sapar barysynda Ýılber Rosstyń Memleket basshysy jáne Úkimet múshelerimen kezdesýi, sondaı-aq Astana jáne Almaty qalalarynda eki eldiń isker toptary ókilderiniń qatysýymen qazaqstandyq-amerıkalyq bıznes-forýmdar uıymdastyrylady», - deıdi Aıbek Smadııarov.
QR SІM resmı ókiliniń aıtýynsha, AQSh-tyń Saýda mınıstriniń Qazaqstanǵa sapary ekijaqty qatynastar tarıhyndaǵy alǵashqy sapar bolyp otyr. Bul sapar eki eldiń arasyndaǵy strategııalyq áriptestikti, sonyń ishinde saýda jáne ekonomıka, ınvestıtsııa salalaryn odan ary damytýǵa yqpal etedi.
«Aıta ketetin jaıt, statıstıkaǵa sáıkes, 2017 jyly Qazaqstannyń AQSh-pen saýda kólemi 1 mlrd 518 mln AQSh dollaryn qurady. Sonyń ishinde Qazaqstannyń AQSh-qa eksport kólemi 354,6 mln AQSh dollaryn qurasa, AQSh-tyń Qazaqstanǵa ımport kólemi 1 mlrd 164 mln AQSh dollaryn qurady. 2018 jyldyń qańtar-tamyz aılarynyń aralyǵynda eki eldiń arasyndaǵy saýdanyń kólemi 1 mlrd 462 mln AQSh dollaryna jetti. Bul kórsetkish 2017 jyldyń uqsas kezeńimen salystyrǵanda 29 paıyzǵa joǵary», - deıdi ol.
Eske sala keteıik, Qazaqstan Prezıdenti osy jyldyń 16-18 qańtarynda Amerıka Qurama Shtattaryna resmı saparmen barǵan bolatyn. Onda Nursultan Nazarbaev AQSh Prezıdenti Donald Tramppen kezdesken edi. Sondaı-aq AQSh-tyń resmı jáne isker toptar ókilderimen kezdesý ótkizdi. Nátıjesinde quny 7 mıllıard teńgeni quraıtyn 20-dan astam kelisimge qol qoıyldy.
