AQSh-tyń Parıj kelisiminen shyǵýy jaǵdaıdy ýshyqtyrmaıdy - Uzaqbaı Qarabalın
ASTANA. QazAqparat - AQSh-tyń Parıj kelisiminen bas tartýy qajetsiz qadam. Sebebi bul qujat aıasyndaǵy máselelerdi birlesken kúsh-jigermen sheshken jón. Búgin energetıkalyq sheshimder máselesine arnalǵan konferentsııada «KAZENERGY» qaýymdastyǵy tóraǵasynyń orynbasary Uzaqbaı Qarabalın osylaı málim etti, dep habarlaıdy QazAqparat.
«Álemdik energetıkada perspektıvalardy baǵalaý turǵysynda Parıj kelisimine qatysýshy barlyq elder tarapynan saıası qoldaýdyń qajettigin jete túsingen jón. AQSh-tyń atalǵan Kelisimnen shyǵý bastamasy bul baǵyttaǵy jaǵdaıdy kúırete qoımaıdy, alaıda qajetsiz jaıt», - dep atap ótti U. Qarabalın.
Onyń sózine qaraǵanda, álemdik energetıkanyń tıimdi damýy men Parıj kelisimin oryndaý óte kúrdeli ári kópfaktorly úderis bolyp tabylady.
«Meniń oıymsha, negizgi ustanymdardyń, maqsattar men problemalardy sheshýdiń qadamdaryna keshendilik pen júıelik, tehnologııalyq qamtamasyz etýdi jandandyrý, saıası qoldaý, halyqaralyq belsendi yntymaqtastyq enip, sondaı-aq áleýmettik máselelerge erekshe nazar aýdarylýy tıis. Birlesken kúsh-jigerdiń arqasynda klımat jónindegi Parıj kelisimi máselelerin sheshýmen ony júzege asyrýda ońtaıly qadamdar aıqyndalady dep oılaımyn», - dedi Uzaqbaı Qarabalın.
Onyń atap ótýinshe, halyqaralyq energetıkalyq agenttiktiń derekterine sáıkes, álemdik energetıkaǵa baǵyttalǵan ınvestıtsııa kólemi 2016 jyly 1,7 trln dollardy qurap, bul kórsetkish 2015 jylmen salystarǵanda 12 paıyzǵa tómen boldy.
«Qarjylandyrýdyń qysqarýy birinshi kezekte munaı jáne gaz salasyna baılanysty bolyp otyr. Osy agenttiktiń esepteýine qaraǵanda, Parıj kelisimin oryndaýdyń eń tómengi talpynysynyń ózinde álemdik energııalyq qamtamasyz etýge 2040 jylǵa deıin 44 trln dollar somasynda ınvestıtsııa qajet sanalady», - dedi ol.
Esterińizge sala keteıik, bıyl AQSh Prezıdenti Donald Tramp óz eliniń klımat jónindegi Parıj kelisiminen shyǵatyndyǵyn jarııalady. Osy oraıda maýsym aıynda Astanada ótken XIV Eýrazııa medıa forýmynda Nobel syılyǵynyń laýreaty (Úndistan) Radjendra Pachaýrı klımattyń ózgerýine qatysty aıtylǵan Donald Tramptyń pikirin synaǵan bolatyn.
