AQSh-tyń Oklahoma shtatynda polıtsııa qymetkeri qara násildi azamatty atyp tastady
AQSh. QazAqparat - AQSh-tyń Oklahoma shtatyna qarasty Talsa qalasynda polıtsııa qyzmetkeri qarýy joq qara násildi azamatty atyp tastady, dep habarlaıdy ria.ru Assoshıeıted Press agenttigine silteme jasap.
Agenttik ókilderiniń habarlaýynsha, oqıǵanyń beınejazbasynda eki qolyn joǵary kótergen azamattyń óziniń jol talǵamaıtyn kóligine qaraı júrip bara jatqany baıqalady. Sol sátte oǵan qarata oq atylyp, qolyn kótergen azamat jerge qulaıdy. Oqıǵaǵa qatysty taratylǵan málimetterde polıtseıler qara násildi azamatty aldymen toqtatyp, sosyn qurban etkendigi aıtylady.
Beınefaıldar jarııalanǵanǵa deıin polıtsııa bastyǵy Chak Djordan tártip saqshylary atqan Terens Kratcherdiń qarýsyz bolǵandyǵyn málim etti. Al, onyń kóliginen qarý sol boıy tabylmaǵan.
AQSh-ta jazda aq násildi polıtsııa qyzmetkerleriniń Mınnnesota men Lýızıana shtattarynda eki afroamerıkalyqty óltirýinen keıin narazylyq sharalarynyń jańa tolqyny kóterildi. Shilde aıynyń ortasyna taman Mıssýrı shtatynyń turǵyny Geıvın Long AQSh-tyń Baton-Rýj qalasynda atys uıymdastyryp, onyń saldarynan úsh polıtsııa qyzmetkeri mert boldy. Atysty uıymdastyrǵan azamat atyp óltirildi.
Oǵan deıin 25 jasar qara násildi Aýǵan soǵysynyń ardageri Mıka Djonson Dallasta bolǵan tártipsizdikter kezinde polıtseılerge qarata oq atyp, birneshe adam jaraqat aldy, 4 tártip saqshysy kóz jumdy. Bul jaǵdaı 2001 jyldyń 11-qyrkúıeginen keıin AQSh-tyń quqyq qorǵaý organdary úshin eń qandy oqıǵa boldy.
