AQSh-tyń munaı óndirý kórsetkishi rekordtyq deńgeıge jetti

ASTANA. QazAqparat - Ótken jyly AQSh ortasha alǵanda táýligine 9,6 mln barrel munaı óndirdi. Rekordtyq kórsetkish týraly The Washington Post gazeti jazdy, dep habarlaıdy TASS agenttigi.

Basylymnyń jazýyna qaraǵanda eldegi munaı óndirýdiń joǵary kórsetkishi tek 1970 jyly tirkelgen. Sol kezde kúnine 10 mln barrelden astam munaı óndirilgen.

Óndirý kóleminiń artýyna bıtýmozdy qatparly óńdeý tehnologııasynyń jetildirilýi sebepshi bolǵan. «Qatparly munaı óndirisinen tabys tabý úshin álemdik munaı baǵasy barreline 55-60 dollar arasynda bolýy qajet, - dep jazady The Washington Post. - Álemdik ekonomıkanyń ósýi jáne OPEK elderiniń munaı óndirýge shekteý qoıýy saldarynan munaı baǵasy ósip, barreline $60-tan asty».

Sondaı-aq, byltyr 22 jeltoqsanda AQSh prezıdenti Donald Tramp salyq reformasyna qatysty zańnamaǵa qol qoıdy, bul Alıaskanyń Arktıkalyq qoryǵyndaǵy munaı ken oryndaryn ıgerýge jol ashady.

«Birneshe jyl buryn AQSh-tyń táýligine ortasha óndirý 10 mln barrelden asyp ketýi múmkin emes kórinetin, - deıdi The Washington Post. - 2005 jyly qyrkúıekte kúnine 3,8 mln barrel, 2008 jyldyń qyrkúıeginde sonsha kólemde munaı óndirilgen».

«Іri qatparly munaı ken oryndary Tehas, Montana, Soltústik Dakota, Oklahoma, Kolorado, Vaıomıng, Nebraska shtatynyń birqatar aýdandarynda ornalasqan», - delingen maqalada.

Gazettiń atap ótýinshe, «AQSh-tyń munaıǵa degen táýliktik suranysy 20 mln barrel shamasynda».