AQSh-tyń kınosynshylar keńesi jyl fılmin atady
ASTANA. QazAqparat - AQSh kınosynshylar Ulttyq keńesi jyldyń úzdik fılmi retinde amerıkandyq rejısser Pıter Farrelıdiń «Jasyl kitap» (Green book, 2018) atty kartınasyn atady, dep habarlaıdy Deadline Hollywood portaly.
«Bul tamasha dostyqqa degen jyly ári shynaıy kózqaras, ol mahabbat oqıǵasy men aıanysh jáne adamgershilik sezimi jańǵyrǵan sáttiń ekranǵa shyǵarylýy», - dep bólisti lenta týraly pikirimen keńes dırektory Ennı Shýlhov.
Úzdik rejısser ataǵyna «Juldyz týyldy» (A Star is Born, 2018) kartınasyn shyǵarǵan Bredlı Kýper ıe boldy.
Úzdik akter - «Jasyl kitapta» Myljyń Tonıdiń rólin somdaǵan Vıggo Mortenson, al úzdik aktrısa - «Juldyz týyldy» fılmindegi róli úshin Ledı Gaga atanyp otyr.
Marapattaý rásimi 8 qańtar kúni NBR Awards gala-kontsertinde ótedi.
