«AQSh-tyń Qazaqstandaǵy oqıǵalarǵa qatysy bar» - feık

NUR-SULTAN. QazAqparat - Telegram messendjerinde AQSh-tyń Qazaqstandaǵy Elshiligi ótken jyldyń jeltoqsan aıynda elge terrorıstik shabýyl jasalatyny týraly eskertkeni, sondaı-aq byltyr qazan aıynan bastap AQSh azamattaryna Qazaqstanǵa kelmeýge keńes bergeni týraly habarlama tarady. Keıbir paıdalanýshylardyń pikirinshe, bul AQSh-tyń qaıǵyly oqıǵalarǵa qatysy bar ekendigin dáleldeıdi. Stopfake.kz saıty bul aqparattyń jalǵan ekenin jazady, dep habarlaıdy QazAqparat.

Málim bolǵandaı, Telegram habarlamasyna ótken jyldyń 16 jeltoqsanynda bolýy múmkin mıtıngiler týraly jazylǵan skrınshot tirkelgen. AQSh Elshiliginiń habarlaýynsha, bul mátinniń qazirgi kezde Qazaqstanda bolyp jatqan oqıǵalarǵa eshqandaı qatysy joq.

«Táýelsizdik kúnine josparlanǵan narazylyqtar týraly eskertýdiń bul mátini AQSh dıplomatııalyq mıssııasynyń veb-saıtynan alynǵan jáne 2021 jylǵy 16 jeltoqsanynda jarııalanǵan. Onyń qazirgi tolqýlarǵa qatysy joq. Biz Qazaqstanmen qarym-qatynasymyzdy baǵalaımyz jáne Qazaqstandaǵy oqıǵalardyń órbýin muqııat qadaǵalap otyrmyz. Biz azamattarǵa saıahattyń táýekelderin baǵalaýǵa kómektesý úshin álemniń ár elindegi qaýipsizdik pen qorǵanys týraly aqparat usynamyz.

Memlekettik departament AQSh úkimeti qyzmetkerleriniń, olardyń qaraýyndaǵy adamdar men AQSh azamattarynyń densaýlyǵy, qaýipsizdigi men qorǵalýyna basymdyq beredi. Saıahat týraly eskertýler men habarlamalar AQSh azamattaryna qaýipsizdik týraly sońǵy aqparatty bilýge kómektesedi. Barlyq eskertýler saıtta qoljetimdi.

Amerıka Qurama Shtattary Qazaqstannyń táýelsizdigin, egemendigin jáne aýmaqtyq tutastyǵyn únemi qoldaıdy. Bizdiń 30 jyldyq yntymaqtastyǵymyz Ortalyq Azııadaǵy qaýipsizdik, damý, órkendeý jáne negizgi bostandyqtarǵa negizdelgen jáne aldaǵy jyldary bizdiń ekonomıkalyq baılanystarymyz, qaýipsizdik pen adamdar arasyndaǵy qatynastar nyǵaıa túsedi dep senemiz.

Oqyrmandardy jalǵan aqparat pen boljamdarǵa senbeýge shaqyramyz. Anyqtama úshin, bizdiń barlyq «dabyldy» habarlamalarymyzdy (Alerts) myna jerden oqýǵa bolady», – delingen AQSh-tyń Qazaqstandaǵy Elshiliginiń baspasóz qyzmeti jaýabynda.