AQSh-tyń Kalıfornııa shtatyndaǵy atys kezinde eki adam mert boldy
SAKRAMENTO. QazAqparat – Kalıfornııa shtaty Red-Blaff qalasyndaǵy Walmart saýda jelisiniń suryptaý ortalyqtarynyń birinde atys bolyp, sonyń saldarynan 2 adam qaza taýyp, tórt adam jaralandy, dep habarlaıdy QazAqparat CNN-ge silteme jasap.
Kýágerlerdiń aıtýynsha, belgisiz adam suryptaý ortalyǵynyń ǵımaratyn tórt ret aınalyp shyǵyp, kireberisti kólikpen soǵyp, qıratqan. Sodan keıin qylmysker avtokólikten shyǵyp, jartylaı avtomatty vıntovkamen ǵımarat ishinde bolǵan qyzmetkerlerge oq jaýdyrǵan.
Kýágerler shamamen 60 márte oq daýsyn estigenderin aıtady. Qyzmetkerler úreılenip, shabýyldaýshynyń oǵyna iligip ketpes úshin ǵımarattan qashyp shyǵýǵa tyrysqan.
Jergilikti polıtsııa shabýyl jasaǵan adamdy atyp úlgerdi. Keıinirek ol aýrýhanaǵa jetkizildi.
Sonymen qatar, Red-Blafftaǵy Áýlıe Elızaveta qoǵamdyq aýrýhanasyna zardap shekken alty adam jetkizildi. Ekeýi qaza tapty, qalǵan tórteýiniń jaǵdaı qanaǵattanarlyq dep baǵalanyp otyr. Oq atqan adamnyń jaǵdaıy belgisiz. Aýrýhanadaǵylar onyń jaralanǵanyn nemese mert bolǵanyn habarlamady.
Walmart kompanııasy bul oqıǵaǵa qatty qaıǵyryp otyrǵandaryn málimdedi.
«Qazirgi ýaqytta biz qyzmetkerlerimiz ben olardyń otbasyna qoldaý kórsetýge tyrysyp jatyrmyz. Polıtsııa tergeý júrgizip jatyr, biz olarmen baılanysta bolyp, kómektesemiz», - delingen kompanııa málimdemesinde.
