AQSh-tyń Florıda shtatynda kámeletke tolmaǵan bala bir jasar qyzdy atyp óltirdi

VAShINGTON. QazAqparat – Florıda shtatynda kámeletke tolmaǵan bala bir jasar qyzdy atyp óltirip, onyń eki jasar ápkesin jaralaǵan. Osy oqıǵadan soń, qarý qoldanǵan balanyń ákesi qamaýǵa alyndy, dep habarlaıdy QazAqparat ABC News basylymyna silteme jasap.

Polıtsııanyń málimetinshe, senbi kúni keshke balanyń ákesi 45 jastaǵy Roderık Dýeın Rendall Pensakola qalasyndaǵy qonaqúıden shyǵyp, qarýyn shkafta qaldyryp ketken. Onyń 8 jastaǵy uly qarý turǵan jerdi bilgen. Bala qarýdy alyp, oıyn barysynda bir jasar qyzdy atqan, oq qyzdyń denesinen ótip, onyń eki jasar ápkesin jaralaǵan. Bólmedegi tórtinshi bala zardap shekken joq.

Qaza tapqan qyz ben onyń jaralanǵan ápkesi atys bolǵan sátte qonaqúıdiń sol bólmesinde uıyqtap jatqan jáne olar Rendalldyń tanys áıeliniń qyzdary bolǵan.

Tergeýshilerdiń aıtýynsha, qaıtyp oralǵan Rendall, polıtsııa qyzmetkerleri kelgenshe bólmeden tapansha men esirtkini alyp, qylmysty jasyrmaq bolǵan.

Balanyń ákesi aıǵaqtardy burmalady, salǵyrttyq tanytty jáne atys qarýyn saqtaý erejesin buzdy degen aıyppen qamaýǵa alyndy. Rendall buǵan deıin 14 aýyr qylmys jasaǵany úshin sottalǵan bolatyn. Qazirgi ýaqytta Eskambııa okrýginiń túrmesine qamaldy.