AQSh-tyń eks-prezıdenti Reıgannyń úıi $6,45 mln satyldy
ASTANA. QazAqparat - AQSh-tyń burynǵy prezıdenti Ronald Reıgannyń Los-Andjelestiń Lıttl-Holmbı aýdanyndaǵy úıi $6,45 mln satyldy. Bul týraly juma kúni Los Angeles Times gazeti habarlady.
Basylymnyń deregi boıynsha, ekiqabatty ǵımarattan jasalǵan rezıdentsııa 1938 jyly salynǵan. Reıgan bul úıdi 40-shy jyldary satyp alyp, birinshi jubaıy, aktrısa Djeın Ýaımanmen birge ómir súrgen. 1949 jyly ekeýi ajyrasqannan keıin úı jubaıyna qalǵan. Aktrısa bul úıde ekinshi kúıeýimen de turǵan. Alaıda, gazette 2007 jyly Ýaıman kóz jumǵannan keıin rezıdentsııany kim ıelengeni jazylmaǵan.
Úı osy jyldyń maýsymynda $7 mln somaǵa satylymǵa shyǵarylǵan. Kimniń satyp alǵany habarlanbaǵan.
Ronald Reıgan - amerıkalyq saıası jáne memleket qaıratkeri. AQSh-tyń 40-shy prezıdenti (1981-1989).
