AQSh-tyń burynǵy Prezıdenti bıyl elordada ótetin VI Astana ekonomıkalyq forýmyna qatyspaq
ASTANA. 14 naýryz. QazAqparat - AQSh-tyń burynǵy Prezıdenti Bıll Klınton bıyl elordada ótetin VI Astana ekonomıkalyq forýmyna qatyspaq. Bul týraly búgin Astanada atalǵan forýmdy uıymdastyrýǵa baılanysty ótken baspasóz máslıhatynda QR Parlamenti Senatynyń depýtaty, «Ǵalymdardyń Eýrazııalyq ekonomıkalyq klýby» qaýymdastyǵy úılestirý komıtetiniń teń tóraǵasy Serik Nógerbekov málim etti.
Onyń aıtýynsha, VI AEF-ty uıymdastyrý sharalaryna Madrıd klýby úles qosýda. «Bul óte mártebeli qoǵamdastyq. Ótken jyly biz Madrıd klýbynyń jyl saıynǵy keńesine qatystyq. Osy oraıda AQSh-tyń 42-shi Prezıdenti Bıll Klıntonmen kezdestik. Klınton myrza bizdiń shaqyrýymyzdy jyly lebizben qabyl aldy. Atap aıtsaq, ol Astana ekonomıkalyq forýmynyń jumysyna belsendi túrde qatysýǵa nıet bildirdi», - dedi S. Nógerbekov.
