AQSh-tyń bes eks-prezıdenti qaıyrymdylyq kontsertine qatysty
ASTANA. QazAqparat - «Harvı» daýylynan asa zor zardap shekken Kolledj-Steıshen qalasyndaǵy Tehas aýyl sharýashylyǵy jáne mashına jasaý ýnıversıtetinde úsh saǵattyq qaıyrymdylyq kontserti uıymdastyryldy.
Djımmı Karter, Bıll Klınton, Úlken Djordj Býsh jáne onyń uly Kishi Býsh, sondaı-aq Barak Obama osy sharanyń qurmetti qonaqtary boldy.
Kontsert barysynda AQSh prezıdenti Donald Tramptyń vıdeoúndeýi de berildi. Ol «Irma», «Marııa», «Neıt», «Harvı» daýyldarynan, sondaı-aq Kalıfornııadaǵy alapat tabıǵı órtten Amerıka halqy úlken zardap shekkenin aıtty.
Qyrkúıektiń basynan beri osy bes burynǵy prezıdent uıymdastyryp jatqan qaıyrymdylyq kampanııasynyń resmı ókilderi senbi kúni aktsııa barysynda jalpy 31 mln dollar jınalǵanyn málimdedi. Bul qarjy negizinen Tehas jáne Florıda shtattaryna jáne Pýerto-Rıko men Amerıkanyń Vırdjınııa araldaryndaǵy apattan zardap shekken turǵyndarǵa beriledi.
