AQSh-tyń bas konsýly Almatynyń ortalyq meshitine bardy

ALMATY. QazAqparat - Amerıka Qurama Shtattarynyń Almatydaǵy bas konsýly Karolın Sevıch Almatynyń ortalyq meshitine bardy, dep habarlaıdy QazAqparat tilshisi.

Almaty qalasynyń bas ımamy Tólebı Dádiluly bas konsýl Karolın Sevıch pen kómekshisi, dıplomat Samýel Fantelamen kezdesip, meshittiń dinı tynys-tirshiligimen tanystyrdy. Sondaı-aq, Qazaqstan ult pen ulysty bólip jarmaı, birneshe din ókilderin bir shańyraq astynda tatý ómir súrýine jaǵdaı jasalǵanyn atap ótti.

«AQSh-tyń konsýldyq ókilderi Qazaqstannyń dinı turaqtylyq pen kelisim negizindegi saıasatyn qoldaıtynyn jetkizdi. Karolın Sevıch barsha musylman úshin qasıetti Ramazan aıynyń kelýimen quttyqtady. Bas ımam Tólebı Dádiluly qazaqy saltpen qonaqtarǵa kádesyı tartý etip, ulttyq dám usyndy»,- dep habarlady Almaty ortalyq meshitiniń baspasóz qyzmeti.