AQSh-tyń áýe kompanııalary Qazaqstanǵa bıyl usha alady
ASTANA. QazAqparat - Amerıka Qurama Shtattarynyń áýe kompanııalary aǵymdaǵy jyldan bastap Qazaqstanǵa ushýdy oryndaı alady. Bul týraly búgin QR Indýstrııa jáne ınfraqurylymdyq damý birinshi vıtse-mınıstri Roman Sklıar aıtty, dep habarlaıdy QazAqparat tilshisi.
«Memleket basshysynyń tapsyrmasyn oryndaý maqsatynda AQSh-qa ushýdy júzege asyrý úshin quqyqtyq baza bekitildi. Búgingi kúni Qazaqstan men Japonııa arasynda quqyqtyq baza bar jáne ol elder arasynda aptasyna 14 reıs jıiligimen reısterdi ashýǵa múmkindik beredi. Aǵymdaǵy jyly Japonııa men AQSh-qa mundaı reısterdi ashý úshin otandyq kompanııalarǵa memlekettik qoldaý kósetý máselelerin talqylaımyz», - dedi ol mınıstrliktiń keńeıtilgen alqa májilisinde.
Osy oraıda, alqa májiliske tóraǵalyq etip otyrǵan QR Úkimet basshysynyń birinshi orynbasary Asqar Mamın bastapqy kezeńde bul reısterdiń shyǵynǵa batatyndyǵyn aıtyp, olardy sýbsıdııalaý máselesin sheshý qajettigin eskertti.
«Qazir reısterdi sýbsıdııalaý úshin qujattar toptamasyn jasap jatyrmyz. Japonııamen kelisimge qol qoıylǵan jáne ekinshi jartyjyldyqta bul elge tikeleı reıs ashamyz. Ushýlardy Eır Astana oryndaıdy. Al AQSh-qa qatysty aıtar bolsam, Azamattyq avıatsııa komıteti men Eır Astana kompanııasy qaýipsizdik krıterıılerine sáıkes Amerıkanyń avıatsııalyq bıliginiń aýdıtinen ótýi qajet. Bul shamamen 2 jyl ýaqytta alady. Birinshi kezeńde sheteldik kompanııa tartylýy múmkin. Osylaısha, amerıkalyq áýe kompanııalary bıyldan bastap Qazaqstanǵa ushýdy oryndaýǵa múmkindigi bar. Al biz AQSh-qa 2021 jyly usha alamyz»,- dedi Roman Sklıar.
Atalǵan máselege qatysty pikir bildirgen Eır Astana áýe kompanıaısynyń prezıdenti Pıter Foster bul protsesti jedeldetýge de múmkindik bar ekendigin aıtty.
«Ásirese, AQSh ishki qaýipsizdik departamentiniń maquldaýyn alý uzaq protsess. Kelissózder qazirdiń ózinde bastaldy. Bul máselede mınıstrlikpen tyǵyz jumys jasap jatyrmyz. Nıý-Iork reısterin aralyq pýnkter arqyly júzege asyrý nusqasy qarastyrylýda. Bul da kommertsııalyq tasymaldaýdaýlar týraly qosymsha kelisimge qol qoıýdy talap etedi. Degenmen, barlyǵy josparǵa saı bolsa, onda kelesi jyldan bastap ushýlardy bastaýdy kózdep otyrmyz», - dedi P.Foster.
Eske sala ketsek, 30 qańtarda ótken Úkimettiń keńeıtilgen otyrysynda Elbasy Amerıka Qurama Shtattary men Japonııaǵa tikeleı áýe reısin ashý máselesi bıyl sheshilýi tıis ekendigin aıtqan bolatyn.
