AQSh-tyń ataqty horeograftary Astanaǵa jınalady
ASTANA. QazAqparat - 22 shilde men 5 tamyz aralyǵynda Astanada tuńǵysh ret «CENTRAL ASIAN DANCE FESTIVAL» halyqaralyq sheberlik sabaqtar festıvali ótedi. Shara uıymdastyrýshylary - Amerıka Qurama Shtattarynyń Qazaqstandaǵy elshiligi men Qazaq Ulttyq horeografııa akademııasy, dep habarlandy elorda ákimdiginiń resmı saıtynda.
Sheberlik sabaqtar festıvaline Qazaqstan, Túrikmenstan, Tájikstan, Qyrǵyzstan, Ózbekstan elderiniń talantty bıshileri men horeograftary qatysady. Olar birneshe aı buryn uıymdastyrylǵan beıne-kastıngtensúrinbeı ótken bolatyn. Osylaısha, Amerıka Qurama Shtattarynyń elshiligi bólgen granttyń arqasynda bı óneriniń 100 sheberi esh aqysyz saıysqa túsedi. Olardyń 50-i Qazaqstan óńirleriniń, 30 - Astananyń jáne 20-sy Ortalyq Azııa elderiniń namysyn qorǵaıtyn bolady.
Festıval aıasynda, sondaı-aq Pılkıngton Ketrın, Breanna Ýıllıams syndy AQSh-tyń áıgili horeograftarynyń qatysýymen ótetin eki aptalyq sheberlik sabaqtaryn uıymdastyrý josparlanǵan. Kásipqoı bıshiler neoklassıkalyq baletten, kontemporarıden, modrennen, ımprovızatsııadan, brodveıden, djazdan, hıp-hoptan, sonymen qatar bıdi sýretke, beınekameraǵa túsirýden, art-menedjmentten skıll-aptar júrgizbek.
Budan bólek, festıval qatysýshylary negizgi amerıkandyq bı formalaryn ózderiniń oqytý baǵdarlamalaryna engizýge, marketıng pen kommýnıkatsııa salasyna qatysty bilimin arttyrýǵa múmkindik alady. Budan bólek, búgingi tańda kez kelgen bıznestiń tabysty júzege asýynyń mańyzdy marketıngtik bóligin qalyptastyrýshy kıno, fotosýretter men zamanaýı sandyq ónerge arnalǵan quraldarmen tanysady.
Uıymdastyrýshylardyń atap ótýinshe, eki aptaǵa sozylatyn shara mádenıaralyq ári kásibı tájirıbe almasý isine negiz bolyp, Ortalyq Azııa aýmaǵyndaǵy neoklassıkalyq jáne zamanaýı horeografııanyń damýyna úlesin qospaq.
«CENTRAL ASIAN DANCE FESTIVAL» sheberlik sabaqtar festıvaliniń saltanatty ashylýy 22 shilde kúni Qazaq Ulttyq horeografııa akademııasynda ótedi.
