AQSh-tyń áskerı bazasynda birneshe adamdy atyp óltirgen áskerıdiń ózi tiri qaldy
ASTANA. Qarashanyń 6-sy. QazAqparat - AQSh-tyń Tehas shtatyndaǵy Fort-Hýd áskerı bazasynda áskerı qyzmetshilerge oq atqan áskerıdiń ózi tiri qaldy, dep habarlaıdy «Azattyq» radıosy.
Áskerı baza ókiliniń habarlaýynsha, Nıdal Málik Hasan qazir gospıtalde jatyr. Buǵan deıingi aqparattarda onyń oqqa ushqany aıtylǵan bolatyn.
Bazadaǵy armııalyq medıtsınalyq ortalyqta bolǵan qandy qyrǵynnyń saldarynan 12 adam qaza bolyp, 31 adam jaralanǵan.
Áskerı psıhıatr bolyp tabylatyn maıor Hasannyń áreketiniń sebebi ázirge belgisiz. Ony jaqyn kúnderde shetelge qyzmetke jóneltý josparlanǵany aıtylyp otyr. Biletinderdiń aıtýynsha, Hasan Irak pen Aýǵanstandaǵy áskerı is-qımyldarǵa narazy bolǵan.
Prezıdent Barak Obama Ford-Hýd bazasyndaǵy bul qandy qyrǵyndy «jantúrshigerlik oqıǵa» dep atady: «úıden alys jerlerde bolǵan shaıqastarda amerıkan jaýyngerlerin joǵaltý óte aýyr. Al olardyń Qurama Shtattardyń aýmaǵynda áskerı bazada oqqa ushqanyn estigende, esten tana jazdaısyń», dedi ol.
Fort-Hýd - álemdegi eń úlken amerıkandyq áskerı garnızon. Onda turǵan áskerıler alǵashqylardyń biri bolyp 2003 jyly Irakqa attandyrylǵan 1-shi saýytty-kavalerııalyq dıvızııa ornalasqan.
