AQSh-tyń aqsha-nesıelik saıasatynyń ózgerýi damýshy elderden kapıtaldyń jylystaýyna soqtyrady - sarapshy I. Chakarov
ALMATY. QazAqparat - AQSh-tyń Ortalyq federaldy júıesi bıyl óziniń aqsha-nesıelik saıasatyna ózgeris engizip, paıyzdyq mólsherlemesin kótere bastaıdy.
Al bul, damýshy elderge eleýli túrde áser etedi. Búgin Almatyda ótken baspasóz máslıhatynda Citi ǵalamdyq qarjy kompanııasynyń Reseı jáne TMD boıynsha bas ekonomısi, ekonomıka ǵylymdarynyń doktory Ivan Chakarov osylaı málim etti.
«AQSh-tyń aqsha-nesıelik saıasatynyń ózgerý saldarynan paıyzdyq mólsherlemelerdiń ósýi - kapıtaldyń jylystaýyna nemese damýshy elderdegi kapıtaldardyń AQSh-qa qaıta oralýyna ákep soǵady. Sondyqtan da Úndistan, Indonezııa. Túrkııa jáne Ońtústik Afrıka Respýblıkasy sekildi elderdiń ekonomıkasyna túsip jatqan qysymdar barǵan saıyn ulǵaıa túsýde» - dedi I. Chakarov.
Soǵan qaramastan, sarapshynyń pikirinshe, orta jáne uzaq merzimdi keleshekke damýshy elder úshin optımıstik boljam jasaýǵa bolady.
«Damýshy elderdegi ekonomıkanyń ósý qarqyny damyǵan elderden de joǵary bolady. Tipti, aldaǵy 10 jyl ishinde damýshy elderdiń arqasynda ǵalamdyq ekonomıka 60 paıyzdan 70 paıyzǵa deıin ósedi. Odan basqa, 2014 jyly búkil álem boıynsha ekonomıkalyq damý qarqyndaı túsedi. Bıyl ǵalamdyq ekonomıkanyń ósýi 3,1 paıyzdy quraıtyndyǵyna senimdimiz. Ótken jyly bul kórsetkish 2,5 paıyz bolǵan. Taǵy bir aıta ketetin jáıt, bıyl Batys Eýropa elderiniń ekonomıkasy joǵarylaı bastaıdy. Buǵan deıin bul elderde ekonomıkalyq quldyraý baıqalǵan edi. Bizdiń boljamymyz boıynsha, bıyl Eýroodaqtyń ekonomıkalyq ósý qarqyny 1,5 paıyzdy kórsetedi. Ótken jyly bul kórsetkish 0,2 paıyzdy quraǵan bolatyn» - dedi I. Chakarov.
