AQSh-tyń 7 shtaty quramadan shyqqysy keledi
ASTANA. 16 qarasha. QazAqparat - AQSh-tyń jeti shtatynyń turǵyndary prezıdenttik saılaýdan keıin bir aptadan soń Amerıka Qurama Shtattarynyń qatarynan shyǵý týraly petıtsııaǵa jetkilikti qol jınaǵan. Bul týraly Reuters habarlap otyr.
«40-tan astam shtattyń azamattary Aq úıge petıtsııa toltyryp, AQSh-tan bólingisi keletinderin málimdegen. Sársenbi kúni 7 shtattyń turǵyndary ózderiniń narazylyǵyn resmı túrde áreket etýge májbúrleıtindeı qol jınaǵan» - delinedi agenttik taratqan habarlamada.
Burynyraq Aq úı óziniń resmı saıtynda «Biz - halyqpyz» degen bólim ashyp, onda turǵyndardyń ózderin mazalap júrgen kez kelgen másele boıynsha ótinish jazýlaryna ruqsat bergen bolatyn. eger de qandaı da bir máselege baılanysty amerıkandyqtardan 25 myńnan astam qol jınalsa, Aq úı sol máseleni qaraýǵa mindetti.
Osylaısha, AQSh-tan bóliný týraly sheshimdi 7 shtat belsene qoldaǵan. Bulardyń arasynda Tehas shtaty 100 myń daýyspen alda kele jatyr. Bul shtat barlyq saılaýlarda dástúrli túrde Respýblıkandyqtarǵa daýys beredi (Obama demokrattardyń ókili). Qalǵan alty shtat - Lýızıana, Florıda, Soltústik Karolına, Alabama, Djordjııa jáne Tennessı shtattarynyń árqaısysy 30 myń qoldan jınaǵan. Bul jeti shtattyń ishinen tek Florıdada ǵana saılaýda Barak Obamany jaqtaǵandardyń sany kóp bolǵan.
