AQSh túrmesinen bosaǵan Dıas Qadyrbaev Qazaqstanǵa jetti
ASTANA. QazAqparat - AQSh-tyń Boston qalasynda bolǵan terraktini tergeý barysynda sottalǵan qazaqstandyq Dıas Qadyrbaev Almatyǵa ushyp keldi, dep habarlaıdy QazAqparat tilshisi.
Alty jylǵa sottalǵan D. Qadyrbaev Amerıka túrmesinen merziminen buryn bosap shyqty.
«2018 jyldyń 24 qazanynda bizdiń azamat Dıas Qadyrbaev Almaty qalasyna ushyp keldi. Qazirgi tańda ol bostandyqta. Ol Amerıkada jazasyn tolyǵymen ótep, Qazaqstanǵa qaıtyp keldi», - dedi QR Syrtqy ister mınıstrliginiń resmı ókili Aıbek Smadııarov vedomstvoda ótken brıfıngte.
Aıbek Smadııarov Qazaqstan Respýblıkasynyń aýmaǵyndaǵy onyń jaýapkershiligi máselesin elimizdiń quqyqqorǵaý organynan surap bilý kerektigin atap ótti.
Eske sala ketsek, 2015 jyly qazaqstandyq stýdent Dıas Qadyrbaev amerıkalyq quqyqqorǵaý organdaryna 2013 jyly Bostonda jasalǵan lańkestikti tergeý barysyna kedergi jasaǵany úshin 6 jylǵa túrmege kesilgen bolatyn. Qadyrbaev teraktini jasaǵan Djohar Tsarnaevty tanıtyndyǵyn polıtsııaǵa habarlamaǵan. Sonymen birge, jataqhanadaǵy Tsarnaevtyń bólmesin jınastyryp, tergeýge kedergi keltirgenin moıyndady.
Budan buryn QR Syrtqy ister mınıstrligi qazaqstandyq stýdent túrmeden bosap shyqqanyn jáne ol AQSh-tan Qazaqstanǵa jetkiziletinin rastaǵan edi.
Bostondaǵy lańkestik akti 2013 jylǵy 15 sáýirde jyl saıynǵy marafon kezinde boldy. Eki jarylys saldarynan úsh adam qaza taýyp, 260-tan astamy jaraqat aldy. Jarylysty jasady degen aıyp aǵaıyndy Tsarnaevtarǵa taǵyldy. Úlkeni - Tamerlan polıtseılermen atys kezinde óltirildi. Djohar arnaıy operatsııa kezinde tutqyndalyp, alqabıler soty ony ólim jazasyna kesti.
