AQSh turǵyny salmaǵy 365 keli tartatyn akýlany ustap, 200 kórshisin tamaqtandyrdy
ASTANA. QazAqparat - Amerıkandyq Mılton qalasynyń (Florıda shtaty) turǵyny Djoýı Polk uzyndyǵy 3,35 metr jáne salmaǵy 365 keli tartatyn akýla-makony qarmaqqa túsirdi. Jergilikti BAQ-tyń habarlaýynsha, bul jaǵalaýdan buryn-sońdy aýlanǵan akýlalardyń eń irisi bolyp otyr, dep jazady ITAR-TASS.
Meksıka shyǵanaǵy jaǵalaýynda balyq aýlaǵan Polk balyqty jaǵaǵa shyǵarýǵa bir saǵatqa jýyq ýaqyt qaırat jumsaǵan. «Qarmaqqa tússe de akýla saǵatyna 95 shaqyrymdyq jyldamdyqpen júzdi. Men bala kúnimnen balyq aýlap júrmin, bul jolǵy oljamnyń óte úlken ekenin sezdim. Biraq ta osynshama úlken bolar dep oılaǵan joqpyn», - deıdi ol.
Balyq Polktyń mashınasynyń qorabyna syımaǵan, qoraptan shyǵyp jatqan akýlanyń quıryǵyn qyzyqtaǵan jurt sýretke túsirip alypty.
«Ádette men ustap alǵan akýlalarymdy sýǵa qaıta qoıa beremin, biraq bul balyq qatty jaralanyp qaldy, sondyqtan da báribir ol endi ómir súre almas edi», - dep atap ótti Polk. Ol oljasyn óziniń qupııa retseptisimen pisirip, 200-ge tarta kórshisin rıza qylǵan.
