AQSh turǵyndarynyń 64%-y jasandy ıntellektini qoǵamǵa zııandy dep sanaıdy
ASTANA. KAZINFORM – AQSh-ta júrgizilgen saýalnama turǵyndardyń shamamen 64 paıyzy jasandy ıntellektini qoǵamǵa «zııandy» dep sanaıtynyn kórsetti, dep habarlaıdy Anadolý agenttigi.
The Hill gazetiniń habarlaýynsha, Markett ýnıversıteti 2–9 qyrkúıek aralyǵynda 1023 adamnyń qatysýymen saýalnama júrgizip, olardyń jasandy ıntellektige degen kózqarasyn zerttegen.
Zertteý nátıjesine sáıkes, saýalnamaǵa qatysqandardyń 64 paıyzy jasandy ıntellektini qoǵamǵa «zııandy» dep baǵalaǵan. Al 36 paıyzy kerisinshe pikir bildirgen.
Sonymen qatar tehnologııaǵa qatysty teris kózqarasqa qaramastan, saýalnamaǵa qatysqandardyń 69 paıyzy jasandy ıntellektini qoldanatynyn aıtqan.
JI-diń damýyn baıaýlatý tóńiregindegi pikirtalas jalǵasyp jatyr
AQSh-ta jasandy ıntellektiniń qarqyndy taralýy aıasynda sońǵy kúnderi tehnologııa qaýipti deńgeıge jetpeı turyp, onyń damýyn baıaýlatý týraly úndeýler kóbeıdi.
Anthropic kompanııasynyń bas dırektory Darıo Amodeı, OpenAI bas dırektory Sem Altman, sondaı-aq Tesla jáne SpaceX basshysy Ilon Mask sııaqty tehnologııa salasynyń birqatar jetekshi ókilderi jasandy ıntellektini ázirleý qarqynyn báseńdetýge shaqyrǵan.
Sonymen birge AQSh prezıdenti Donald Tramptyń ákimshiligi jasandy ıntellektiniń damýyn baıaýlatýy múmkin jańa shekteýler engizýdiń ornyna ınnovatsııalardy yntalandyrýǵa baǵyttalǵan ustanymdy qoldap otyr.
Tramp jasandy ıntellekt tehnologııalarynyń baqylaýdan shyǵyp ketý múmkindigine qatysty pikirlerdi «aýrý konspıratsııa» dep ataǵan. Sondaı-aq ol bul saladaǵy jumysty baıaýlatý Qytaıǵa artyqshylyq beretinin málimdegen.
Aıta keteıik, Nobel laýreaty Djeffrı Hınton adamzat jasandy ıntellektini baqylaýdan shyǵaryp alýy múmkin ekenin eskertti. Sebebi JM «urpaǵyna» adamǵa baǵynbaýdy ósıet ete bastady.
